ट्यांकरको ठक्करबाट गयो एक शिक्षकको ज्यान
मोरङ : मोरङको बूढीगङ्गा गाउँपालिका १ स्थित कोशी राजमार्गमा ट्याङकरले मोटरसाइकललाई ठक्कर दिँदा आज एक व्यक्तिको ज्यान गएको छ । ज्यान जानेमा इटहरी उपमहानगरपालिका-४ मा बसोबास गर्दै आएका २९ वर्षीय सन्दीप पौडेल रहेको छ । उनी पेशाले शिक्षक हुनुहुन्छ ।
को२६प ३०५९ नंको मोटरसाइकललाई विपरीत दिशाबाट आउँदै गरेको ना४ख १९०५ नंको ट्याङ्करले ठक्कर दिँदा मोटरसाइकल चालक पौडेलको मृत्यु भएको जिल्ला प्रहरी कार्यालय मोरङका प्रमुख तथा प्रहरी उपरीक्षक विश्व अधिकारीले बताएका छन् ।
डिजेल पुर्याएर सिरहाबाट विराटनगरतर्फ फर्किंदै गरेको अवस्थामा सो दुर्घटना भएको र तुरुन्त उनलाई उपचारका लागि विराट शिक्षण अस्पतालमा लगिइएको थियो । तर त्यहाँ पुग्दा चिकित्सकले मृत घोषणा गरिएको प्रहरीले जनाएको छ ।
पौडेल विराटनगरस्थित आइटीसम्बन्धी पढाई हुने हिमालय कलेजको शिक्षक हुन् । ट्याङ्कर र त्यसका चालकलाई प्रहरीले नियन्त्रणमा लिएको छ ।
