दुलेगौडा-कोत्रे सडकखण्ड मर्मत गर्नुपर्ने माग गर्दै राजमार्ग अवरुद्ध
दमौली : पृथ्वीराजमार्ग अन्तर्गत तनहुँको दुलेगौँडा–कोत्रे सडकखण्ड मर्मत गर्नुपर्ने माग गर्दै स्थानीयवासीले आज राजमार्ग अवरुद्ध गरेका छन् । शुक्लागण्डकी नगरपालिका–२ हलेदीस्थित राजमार्ग भत्किँदा धुलो र हिलोले समस्या परेको भन्दै स्थानीयवासीले बिहान ९ः३० बजेदेखि राजमार्गमा ढुङ्गा तेस्र्याएर अवरुद्ध गरेका हुन् ।
सम्बन्धित निकायको बेवास्ताको कारण सडक मर्मतमा ढिलाइ भएको भन्दै बाध्य भएर आन्दोलनमा उत्रिनुपरेको स्थानीयवासी हरिलाल रिमालले बताउनुभयो । उहाँले भन्नुभयो, “स्थानीय सरकारदेखि प्रदेश सरकारलाई समेत यस बारेमा पटक पटक ध्यानाकर्षण गरायौँ तर हामी्हरुको मागलाई बेवास्ता गरियो । बाध्य भएर राजमार्ग अवरुद्ध गरेका हौंँ ।”
उहाँका अनुसार घाम लाग्दा धुलो र पानी पर्दा हिलोले यहाँका बासिन्दालाई समस्या पर्दै आएको छ । राजमार्ग अवरुद्ध भएपछि दमौली हुँदै पोखरा र पोखरा हुँदै दमौलीतर्फ आउने सयौँ सवारी साधन रोकिएका छन् । राजमार्ग बन्द हुँदा यात्रु मर्कामा परेका छन् ।
गण्डकी प्रदेशको राजधानी पोखरा प्रवेश गर्ने मुख्य नाकाका रुपमा रहेको यस ठाउँको सडकको दुर्दशाका विषयमा प्रदेशसभा सदस्य आशा कोइरालाले केही समय अगाडि प्रदेशसभामार्फत सरकारको ध्यानाकर्षण गराउनुभएको थियो ।
पृथ्वी राजमार्गअन्तर्गत तनहुँको दुलेगौडा-कोत्रे सडकखण्ड मर्मत गर्नुपर्ने माग गर्दै शुक्लागण्डकी नगरपालिका–२ हलेदीमा आइतबार राजमार्ग अवरुद्ध गर्दै स्थानीय । तस्वीर : कृष्ण न्यौपाने, दमौली, (तनहुँ), रासस
