प्रदेश सरकारद्वारा ९० जना स्वयंसेवकका लागि दरखास्त आह्वान (विवरण सहित)
प्रदेश सामाजिक सुरक्षा मन्त्रालयले विभिन्न ६ विषयगत क्षेत्रमा ९० जना स्वयंसेवकका लागि दरखास्त आह्वान गरेको छ । मन्त्रालयले सूचना सार्वजनिक गर्दै स्वास्थ्य, इन्जिनिरयरिङ, कृषि, पशु/भेटेनरी, वन/वातावरण, कम्प्युटरमा गरी ९० जनाको संख्यामा दरखास्त आह्वान गरेको हो।
गण्डकी प्रदेशमा अभाव जनशक्तिको परिपूर्तिका लागि मन्त्रालयको प्रस्तावमा गएको माघ २० गतेको मन्त्रिपरिषद बैठकको निर्णयले ११ वटै जिल्लाका लागि कुल १ सय ३६ जना स्वयंसेवकका लागि दरबन्दी स्विकृत गरेको थियो ।
मन्त्रालयले पहिलो चरणमा स्वास्थ्यतर्फ ३५ जना, इन्जिनियरिङ, कृषि, पशु/भेटेनगरीतर्फ १५/१५ जना, वन÷वातावरण र कम्प्युटरमा गरी ५/५ जनाका दरले ९० पदका लागि दरखास्त आह्वान गरेको जनाएको छ।
प्रदेश स्वयंसेवक परिचालन कार्यविधि २०७५ अनुसार प्रदेशका ११ वटै जिल्लाबाट १८ वर्ष पुगेका नागरिकहरुले आवदेन दिन सक्नेछन् । विषयगत क्षेत्रमा दरखास्त दिन उम्मेदवारले न्यूनतम शैक्षिक योग्यता पूरा गरेको हुनुपर्नेछ।
सार्वजनिक लाभको पदमा बसेको र फौजदारी अभियोगमा संलग्न भई अदालतबाट दोषी प्रमाणित भएको व्यक्तिले उम्मेदवारी दिन पाउने छैनन्।
दरखास्तका लागि मन्त्रालयको वेबसाइटमा रहेको फारम भरी आजको १५ दिन भित्रमा प्रशासन तथा योजना शाखामा पेश गर्न सूचना जारी गरेको छ । स्वयंसेवा गरे बापत जिल्लाको वर्गीकरण अनुसार स्वयंसेवकले जीवन निर्वाह भत्ता पाउनेछन्।
प्रदेशमा ११ वटा जिल्लालाई सुगम र दुर्गमको आधारमा वर्गीकरण गरिएको छ। स्नातकोत्तर उर्तीण स्वयंसेवकले मुस्ताङमा स्वयंसेवा गरेबापत २१ हजार रुपैयाँ प्राप्त गर्नेछ भने सोही योग्यता हाँसिल गरेको स्वयंसेवकले कास्कीमा १९ हजार २ सय प्राप्त गर्नेछ।
छनोटमा परेका उम्मेदवारहरुलाई समितिको निर्णयानुसार सरकारी वा स्थानीयत तहको सम्बन्धित विषयगत क्षेत्रमा खटाइनेछ। स्वयंसेवकको करार अवधि २ वर्षको हुने कार्यविधिमा व्यवस्था गरिएको छ।
