फागुन १ गते देशभर जनयुद्ध र जनआन्दोलका सहिदको सम्मानमा कार्यक्रम गर्न नेकपाको सर्कुलर
काठमाडौं : तत्कालिन एमाले र माओवादी एकता भएपछि जनयुद्ध र जनआन्दोलनका सहिदको पहिलोपटक सम्मानमा कार्यक्रम गर्ने भएको छ । नेकपाका महासचिव विष्णु पौडेलले देशभरका पार्टी इकाइहरूलाई सर्कुलर जारी गरेर जनयुद्ध र जनआन्दोलनका सहिदको सम्मानमा फागुन १ गते देशभर कार्यक्रम गर्न निर्देशन दिएका छन् ।
नेकपाले काठमाडौंमा भने पार्टी कार्यालय धुम्बराहीमा बुधबार बिहान कार्यक्रम गर्ने भएको छ। धुम्बराहीमा आयोजना हुने कार्यक्रममा पार्टी अध्यक्षसमेत रहेका प्रधानमन्त्री केपी शर्मा ओली र अध्यक्ष पुष्पकमल दाहाल प्रचण्डको उपस्थिति हुनेछ । नेकपा स्रोतका अनुसार सातवटै प्रदेश र ७७ वटै जिल्लामा जनयुद्ध र जनआन्दोलनका सहिदको सम्मानमा कार्यक्रम गर्न सर्कुलर जारी गरिएको छ ।
तत्कालिन माओवादीले २०५२ फागुन १ गते जनयुद्धको घोषणा गरेको थियो । सोही दिनको सम्झनामा विगतमा माओवादीले जनयुद्ध दिवस मनाउने गरेको थियो ।
