न्यौपाने बस्तीमा लागेको आगलागी अझै नियन्त्रणमा आउन सकेन
सुर्खेत : कर्णली प्रदेश अनतरगत कालिकोटको पताला गाउँपालिका वडा नम्बर १ खाल्टेमा रहेको सिंगो न्यौपाने बस्तीमा भीषण आगलागी अझै नियन्त्रणमा आउन सकेको छैन ।
स्थानीय बासिन्दा र प्रहरीको टोलीले आगो निभाउने प्रयास गरिरहेका स्थानिय प्रहरी हवल्दार ज्ञानेन्द्रबिक्रम शाहीले जानकारी दिए । दमकल अभावमा आगो नियन्त्रणमा लिन कठिनाई भइरहेको छ ।
आइतबार राति अकस्मात फैलिएको आगलागीका कारण ८६ घर जलेर पूर्ण रुपमा नष्ट भएको र आगलागी अझै नियन्त्रणमा आइनसकेको जिल्ला प्रहरी कार्यालय कालिकोटले जानकारी दिएको छ।
घटनास्थल प्रहरीचौकी रहेको स्थानबाट तीन चार घण्टाको पैदल दूरीमा रहेको छ । आगलागीका कारण मानवीय क्षति भने भएको छैन तर धेरै मात्रामा पशु चौपायाहरु मरेको प्रहरीले जनाएको छ ।
खरले छाएका घर रहेका बस्तीमा आगलागीको कारण खुल्न नसकेको प्रहरीले जनाएको छ ।
