माउण्ट ग्लोरीमा पुगेर कमल थापाले भेटे पूर्व श्री ५
काठमाडौं : राष्ट्रिय प्रजातन्त्र पार्टीका अध्यक्ष कमल थापाले शुक्रबार पूर्व श्री ५ ज्ञानेन्द्र शाहलाई भेटेका छन् । पार्टी कार्यक्रमको सिलसिलामा पोखरा पुगेका थापा पूर्व श्री ५ लाई भेट्न पोखरा १७ दोबिल्लास्थित माउण्ट ग्लोरीमा पुगेका हुन ।
उनीहरुबीच करिब सवा एक घण्टा कुराकानी भएको थियो । भेटमा पूर्व राजा शाहले देशको बिग्रदो अवस्थाप्रति चासो राख्दै चिन्ता व्यक्त गरेको स्रोत भनाई छ । साथै देशका अन्य समसामयिक विषयमा पनि चासो राखेको बताइएको छ ।
उनका अनुसार भेटमा राप्रपा अध्यक्ष थापाले राप्रपाले हिन्दु राष्ट्र, राजसंस्था पुनस्र्थापना र संघीयता खारेजीलगायतको माग राख्दै फागुन ७ गतेदेखि जनसंघर्ष गर्न लागेको जानकारी गराएका थिए ।
उनले पार्टी एकीकरणमा देखिएको समस्या र हुनसक्ने सम्भवानाबारे पनि जानकारी गराएको स्रोतको दावी छ । पूर्वराजा शाह र राप्रपा अध्यक्षबीच शुक्रबार भएको भेटवार्तालाई अर्थपूर्ण रुपमा हेरिएको छ ।
