केहि मन्त्रीहरु हटाउन प्रधानमन्त्रीलाई पार्टी भित्रैबाट चर्को दबाब
काठमाडौं : मन्त्रीहरुले सही ढंगले काम गर्न नसकेको भन्दै प्रधानमन्त्री केपी शर्मा ओलीलाई आफ्नै पार्टीका स्थायी समिति सदस्यहरुले आलोचना गरेका छन् ।
केही मन्त्रीहरुकै प्रस्तुतिले गर्दा समग्र सरकारको आलोचना भैरहेको स्थायी समिति सदस्य एवम् पूर्व अर्थमन्त्री सुरेन्द्र पाण्डेले आरोप लगाए ।
जारी स्थायी समिति बैठकमा आज बोल्दै उनले यस्तो आलोचना गरेका हुन् । उनले केही मन्त्रीहरुको प्रस्तुति ठिक नभएकोले तत्काल उनीहरुलाई हटाउनुपर्ने माग पार्टीमा राखेका छन् ।
उनले को को मन्त्रीको प्रस्तुति राम्रो नभएको हो भनेर बैठकमा नाम भने खुलाएका छैनन् । पाण्डेले प्रधानमन्त्री ओलीले पनि आफ्नो कार्यशैली तत्काल सच्याउनुपर्ने धारणा राखे ।
उनले प्रधानमन्त्रीकै पनि आलोचना गरेका छन् । प्रधानमन्त्रीको पनि कार्यशैलीकै कारण सरकारबारे पब्लिकमा नकारात्मक धारणा बनेको उनको भनाई थियो ।
