शानदार जितसहित लिभरपुल इंग्लिस प्रिमियर लिग फुटबलको शीर्ष स्थानमा
एजेन्सी : शानदार जितसहित लिभरपुल इंग्लिस प्रिमियर लिग फुटबलको शीर्ष स्थानमा उक्लिएको छ । लिग अन्तर्गत शनिबार राति भएको खेलमा जर्गेन क्लोप्पको टिम लिभरपुलले कार्डिफ सिटीलाई ४–१ ले हराएको हो ।
घरेलु मैदानमा भएको खेलमा लिभरपुललाई जिताउन साडिओ मानेले दुई गोल गरे भने मोहम्मद सालह र जेर्डान शाक्विरीले एक एक गोल गरे । कार्डिफका लागि क्यालम प्याटर्सनले एक गोल फर्काए ।
१० औँ मिनेटमा सालहको गोलबाट लिभरपुलले पहिलो हाफमा १–० को अग्रता लियो । ६६ औँ मिनेटमा मानेले अग्रता दोब्बर पारे । ७७ औँ मिनेटमा प्याटर्सनले कार्डिफका लागि गोल फर्काए ।
८४ औँ मिनेटमा शाक्विरीले गोल गरे लिभरपुलका लागि । त्यसको तीन मिनेटपछि मानेले व्यक्तिगत दोस्रो गोल गर्दै लिभरपुललाई ४–१ को जित दिलाए ।
जितपछि १० खेलबाट २६ अंक जोडेको लिभरपुल शीर्ष स्थानमा उक्लिएको छ । एक खेल कम खेलेको म्यानचेस्टर सिटी २३ अंकसहित दोस्रो स्थानमा छ ।
प्रिमियर लिग अन्तर्गत शनिबार राति नै भएका अरु खेलमा बोर्नमाउथले फुलह्यामलाई ३–०, ब्राइटनले वुल्भ्सलाई १–० तथा वाट्फोर्डले हडर्ल्सफिल्डलाई ३–० ले हरायो ।
लेस्टर सिटी र वेष्ट ह्यामले १–१ तथा साउथह्याम्पटन र न्युक्यासलले गोलरहित बराबरी खेलेका छन्।
