बार्सिलोनालाई पछि पार्दै एथ्लेटिको मड्रिड शीर्ष स्थानमा
एजेन्सी : साबिक विजेता बार्सिलोनालाई पछि पार्दै एथ्लेटिको मड्रिड स्पेनिस ला लिगा फुटबलको शीर्ष स्थानमा उक्लिएको छ ।
लिग अन्तर्गत शनिबार राति भएको खेलमा रियल सोसिडाडमाथि २–० को जित निकालेको एथ्लेटिको मड्रिड बार्सिलोनालाई एक अंकले पछि पार्दै शीर्ष स्थानमा पुगेको हो ।
घरेलु मैदानमा भएको खेलमा एथ्लेटिकोका लागि डिएगो गोडिन र फिलिपे लुइसले गोल गरे । गोडिनले ४५ तथा लुइसले ६० औँ मिनेटमा गोल गरेका हुन् । जितपछि १० खेलबाट एथ्लेटिकोको १९ अंक भएको छ । एक खेल कम खेलेको बार्सिलोनाको १८ अंक छ ।
लिग अन्तर्गत आइतबार राति एल क्लासिको अर्थात बार्सिलोना भर्सेस रियल मड्रिड खेल हुँदैछ ।
शनिबार राति भएका खेलमा सेल्टा डी भिगोले एइबरलाई ४–०, जिरोनाले रायो भालेकानोलाई २–१ तथा लेभान्टेले लेगानेसलाई २–० ले हरायो । अर्को खेलमा एथ्लेटिको बिल्बाओ र भ्यालेन्सियाले गोलरहित बराबरी खेलेका छन् ।
