बिहिबार भारत जाँदै प्रचण्ड, उताबाट आएर ३० गते चीन जाने
काठमाडौं : नेपाल कम्युनिस्ट पार्टी (नेकपा) का अध्यक्ष पुष्पकमल दाहाल प्रचण्ड पर्सि बिहिबार भारत भ्रमणमा जाने भएका छन् । भारतबाट फर्किएको तीन दिनपछि उनी अर्को छिमेकी मुलुक चीनको भ्रमणमा जाने कार्यक्रम तय छ ।
दुबै छिमेकी मुलुकले नेकपाका अध्यक्षसँग छलफल गर्ने इच्छा राखेकाले जान लागेको प्रचण्डले बताएका छन् । ‘भारत भ्रमण भनेपछि धेरेले शंका गर्छन्’ खुमलटारस्थित आफ्नै निवासमा पत्रकारहरुसँग कुरा गर्दै पूर्वप्रधानमन्त्री प्रचण्डले भने, राष्ट्रिय हित र विकास निर्माण बाहेक अरु केही एजेण्डा छैन ।’
भारत भ्रमणका क्रममा उनले भोलिपल्ट विदेशमन्त्री शुष्मा स्वराजसँग भेटवार्ता गर्नेछन् । आईसीडब्लूएको निमन्त्रणमा भारत जान लागेका उनले प्रधानमन्त्री नरेन्द्र मोदीका साथै राजनीतिज्ञ, बुद्धिजिवीहरुलाई पनि भेट्नेछन् । प्रचण्ड २६ गते र्फकनेछन् । तीन दिनपछि ३० गते चीन भ्रमणमा जाने कार्यक्रम तय भएको छ ।
त्यसको अघिल्लो अर्का नेता नारायणकाजी श्रेष्ठ प्रकाश नेतृत्वको टोली पनि चीन जाने कार्यक्रम छ । सुरुमा श्रेष्ठ फर्किएपछि प्रचण्ड जाने भनिए पनि सँगसँगै जस्तो तय भएको छ ।
