मुस्लिम समुदाय आज ‘बकर-इद’ पर्व मनाउँदै : सामूहिक नमाज
काठमाडौँ : मुस्लिम समुदायले आज बकर इद पर्व बुधबार मनाउँदै छन् । मुस्लिम धर्मावलम्बीको दोस्रो ठूलो पर्व बकर-इदको अवसरमा एकै ठाउँमा बसी नमाज पढेर चौपायालाई कुर्वानी अर्थात् बली दिई मनाउने गरिन्छ । किम्बदन्ती अनुसार इब्राहिमले सपनामा आफ्नो छोरा इस्माइललाई अल्लाहको आदेशानुसार बली दिन जङ्गलमा लगेपछि छोरालाई बली चढाउनै लाग्दा फेरि अल्लाहले इस्माइलको स्थानमा भेडाको थुम्बालाई राखिदिएको विश्वास गरिन्छ ।
यसरी बलि दिइएको दिन इस्लामिक पात्रो अनुसार १२ औँ महिना जिल हिज्जाको १० औँ तारिखमा भएकाले यस दिन बकर–इद मनाउने परम्परा सुरु भएको हो । बिहानै स्नान गरी इद्गाह वा मस्जिदमा गई मुस्लिम समुदायका भक्तले सामूहिक नमाज पढेपछि एकअर्कालाई इद मुवारक भन्दै शुभकामना आदानप्रदान गर्छन् ।
नमाज पढेपछि मुस्लिम धर्मग्रन्थ कुरान अनुसार खसी, बोका, राँगा, बाख्रा, भैँसी, भेडा र ऊँट आदि चौपायालाई बलि अर्थात् कुर्वानी दिने प्रचलन छ । कुर्वानी दिएको मासु तीनभाग लगाई पहिलो भाग परिवारलाई, दोस्रो भाग इष्टमित्रलाई र तेस्रो भाग गरिब, दिनदुःखीलाई छुट्याउने परम्परा छ । राष्ट्रपति विद्यादेवी भण्डारीले बकर–इद (इदुल जोहा) पर्वले सामाजिक–आर्थिक विकासमार्फत समृद्ध नेपाल निर्माण गर्ने राष्ट्रिय संकल्प पूरा गर्न सकोस् भनी सबैमा शुभकामना व्यक्त गरेकी छन् ।
राष्ट्रपति विद्यादेवी भण्डारीले जारी गरेको शुुभकामना सन्देशमा सामाजिक, साँस्कृतिक, भाषिक र जातीय विविधताबीच अनुपम सुदृढ एकता कायम रहेको हाम्रो देशमा सो पर्वले नेपालीबीच आपसी सद्भाव, सहिष्णुता, मेलमिलाप र भ्रातृत्व प्रबर्द्धन गरी आफ्नो मौलिक संस्कृति र परम्परा संरक्षण तथा सम्बद्र्धनमा महत्वपूर्ण योगदान पुर्याउने विश्वास व्यक्त गरिएको छ ।
प्रधानमन्त्री केपी शर्मा ओलीले हिमालदेखि तराईसम्म बसोबास गर्ने नेपाली मुसलमान समुदायप्रति शुभकामना प्रकट गर्दै सबैको उन्नति, प्रगति र समृद्धिको कामना गरेका छन् । बकर–इद इस्लामका पाँच आधारस्तम्भमध्येको एक हज (तीर्थाटन) सँग जोडिएको उल्लेख गर्दै प्रधानमन्त्री ओलीले बकर इदको अघिल्लो दिन विश्वभरका इस्लाम धर्मालम्बीले हज गर्ने प्रचलनअनुसार यस पटक एक हजार १०० नेपाली मुसलमान हजमा सहभागी हुन लागेको बताएका छन् ।
नेपालगञ्जमा सामूहिक नमाज
यसैबीच ५ नम्बर प्रदेश सरकारले बकर–इदमा सार्वजनिक बिदा दिएपछि खुशी भएका मुस्लिम समुदायले हर्षोउल्लासका साथ बदर–इद मनाइरहेका छन् । नेपालगञ्जको वीपीचोकमा रहेको मस्जिदमा सामूहिक नमाज पढिएको छ । नमाज पढ्न टाढाटाढाबाट वीपीचोकमा आएका थिए । मस्जिदको परिसरमा नअटेपछि बाटोमा बसेर नमाज पढिएको थियो ।
इद र बकरइदमा वीपीचोकमा जम्मा हुँदा ठाउँ नपुगेर बाटोमा बसेर नमाज पढ्ने गरिँदै आएको छ । सामूहिक नमाज पढ्न शहरी विकास मन्त्री मो. इस्तियाक राइसमेत आएका थिए । ५ नम्बर प्रदेश सरकारले बदरइदमा सार्वजनिक बिदा दिएर राम्रो काम गरेको उनले प्रतिक्रिया दिए ।
