वियरिस ट्रेन्डमा नेप्से, २० करोड रुपैयाँभन्दा पनि कम कारोबार
साताको पहिलो दिन आइतबार झिनो अंकले बढेको नेप्से सोमबार भने झण्डै दोहोरो अंकले ओरालो लागेको छ । नेप्से परिसूचक ९।७२ अंकले घटेर १२१०।०९ मा झरेको छ । सेयर बजारप्रति लगानीकर्ता आशावादी हुन नसक्दा पछिल्ला दिनमा परिसूचक मात्र होईन सेयर कारोबार रकममा पनि मन्दी छाउन थालेको छ ।
सोमबार १५८ कम्पनीका ५ लाख ७४ हजार ७८१ कित्ता सेयर १८ करोड ५१ लाख रुपैयाँमा कारोबार भएको छ । आइतबारको तुलनामा कारोबार रकम झण्डै ३ करोडले घटेको छ । आइतबार २० करोड ९३ लाख रुपैयाँको सेयर कारोबार भएको थियो ।
नेप्सेमा कारोबारमा आएका नौं उप समुह मध्ये होटल र उत्पादन तथा प्रशोधन समूह मात्रै बढेको छ । बाँकी ७ समुह भने घटेका छन् । सबैभन्दा बढी बढेको होटल समुह २।२६ अंक र उत्पादन तथा प्रशोधन समुह १।८६ अंकले मात्र बढेको छ ।
यस्तै बीमा समुह ७९।७६ सबै भन्दा धेरै अंकले घटेको छ । बीमा समुहसंगै बैंकिङ्ग, विकास बैंक, हाईड्रोपावर, फाईनान्स, माइक्रो फाईनान्स र अन्य समुह पनि ओरालो लागेका छन ।
शिर्ष कारोबार भएका १० मध्ये ८ कम्पनी बैंकिङ्ग समूहका छन् । एसबीआई बैंक, नेपाल बंगलादेश, सेञ्चुरी कर्मशियल, सिटिजन बैंक, मेगा बैंक, स्टयाण्डर्ड चार्टर्ड बैंक, नेपाल बैंक र नेपाल इन्भेष्टमेन्ट बैंक छन् । ग्रामिण विकास लघुवित्त पनि धेरै कारोबार हुने कम्पनीभित्र समेटिएको छ ।
