विश्वकप फुटबल २०१८ का लागि जर्मनीको अन्तिम टोली घोषणा
काठमाण्डौ : डिफेन्डिङ च्याम्पियन जर्मनीले विश्वकप फुटबल २०१८ का लागि अन्तिम टोलीको घोषणा गरेको छ । जर्मनीले तीन हप्ताअघि २७ सदस्यीय प्रारम्भिक टोली बनाएको थियो । सो टोलीबाट चार खेलाडी हटाइएको छ ।
२३ सदस्यीय अन्तिम टोलीमा म्यानचेस्टर सिटीका विङ्गर मानिने लिरोय सानेसहित बेर्न्ड लिना, जोनथन टाह र निल्स पिटरसन अटाएका छैनन् ।
विश्वविजेता जर्मनीको अन्तिम टिममा साने नपर्नुलाई आश्चर्य मानिएको छ ।
गोलरक्षक म्यानुएल नुयर टिममा परेका छन् । उनी घाइते भएपछि ९ महिनासम्म मैदान बाहिर थिए । तर, शनिबार राति अस्ट्रियासँग भएको मैत्रीपूर्ण खेलबाट नुयर मैदानमा फर्किएका थिए । उक्त खेलमा जर्मनी अस्ट्रियासँग २–१ ले पराजित भएको थियो ।
जर्मनी विश्वकपको चार वर्ष अघिको विजेता हो । उ सन् २०१८ मा हुन लागेको विश्वकपमा समूह एफमा छ । यो समूहमा दक्षिण कोरिया, स्वीडेन र मेक्सिको पनि छन् । जर्मनीलाई विश्वकप विजेताको दाबेदारको रुपमा लिइएको छ ।
