चीनसँग काठमाडौंलाई जोड्ने सबैभन्दा छोटो मार्ग अन्तिम चरणमा
मैलुङ देखि स्याफ्रु सम्म डबल लेनको १७ किलोमिटर सडक निर्माण कार्य नेपाली सेनाले सम्पन्न गरेको छ । सडक खुलेको जानकारी दिन नेपाली सेनाको निर्माण कार्यदलले सरोकारवालाहरु सहितको टोलीलाई शुक्रबार मैलुङदेखि स्याफ्रुबेसीसम्म मोटरमा यात्रा गराएको थियो । १७ किलोमिटर सडक निर्माण सम्पन्न भए सँगै गल्छी, त्रिशुली, बेत्रावती मैलुङ स्याफ्रुवेशी रसुवागढी सडक काठमाडौंलाई चीनसँग जोड्ने सबैभन्दा छोटो मार्ग भएको छ ।
सडक निर्माण सम्पन्न भएपनि स्तरोन्नतिको काम बाँकी रहेको सडक निर्माण कार्यदलका प्रमुख एवं प्राविधिक सेनानी सञ्जय केसीले बताए । स्तरोन्नतिको काम भइरहेकाले नेपाल सरकारलाई सडक हस्तान्तरण गर्नु पूर्व यातायात सञ्चालन गर्न रोक लगाएको केसीले बताए । सेनाले वैशाखसम्ममा सरकारलाई सडक हस्तान्तरण गर्नेछ ।
सरकारले २०७२ सालको भूकम्पपछि सडक निर्माणका लागि सेनालाई जिम्मा दिएको थियो । भूकम्पले क्षति गरेको सिम्लेदेखि मैलुङसम्मको ६ किलोमिटर सिंगल लेन र मैलुङदेखि स्याफ्रुबेसीसम्म १७ किलोमिटर डबल लेन गरी २३ किलोमिटर सडक तोकिएको निर्धारित समयमा सेनाले निर्माण गरेको छ । सडक निर्माण सम्पन्न गर्न हालसम्म ६८ करोड ६९ लाख खर्च भइसकेको छ ।
काठमाडौंबाट बेत्रावती धुन्चे हुँदै रसुवागढी जोड्ने सडकको दूरी १ सय ४५ किलोमिटर रहेको छ । काठमाडौंबाट बेत्रावती मैलुङ हुँदै रसुवागढी जोड्ने सडकको दूरी भने १२२ किलोमिटर मात्र छ । बेत्रावती कालिकास्थान धुन्चे हुँदै स्याफ्रु पुग्न ५४ किलोमिटर रहेको बेत्रावती मैलुङ स्याफ्रुबेसीको दूरी २९ किलोमिटर मात्रै छ ।
उक्त सडक दक्षिण एसिया जोडने लाइफ लाइनको रुपमा रहने छ । गल्छि, बेत्रावती, मैलुङ, स्याफ्रुबेसी रसुवागढी सडक बनेपछि उत्तर (चीनको केरुङ) र (दक्षिण (भारतको ठोरी) जोडिने सबैभन्दा छोटो त्रिदेशीय सडक हुनेछ । अहिले सञ्चालमा रहेको पासाङल्हामु मार्गको बेत्रावती, कालिकास्थान, धुन्चे स्याफ्रुबेसी सडकभन्दा बेत्रावती, मैलुङ, स्याफ्रुबेसी सडक २५ किलोमिटर छोटो रहेको छ ।
चीन सरकारले सन् २०२० सम्ममा सिगात्सेबाट केरुङसम्म रेल ल्याउने गरी तयारी गरेको छ । सेनाबाट सडक हस्तान्तरण गरेपछि सडक विभागले कालोपत्रेको काम अघि बढाउनेछ । सडक निर्माण पूरा भएसँगै रसुवागढीदेखि धादिङको गल्छीसम्मको दुरी ८४ किलोमिटरको हुनेछ ।
गल्छीबाट काठमाडौंसम्मको दुरी ५० किलोमिटर रहेको छ । काठमाडौंबाट चीनको केरुङ करिब ४ घन्टामा पुग्न सकिनेछ । पर्साको ठोरीबाट चितवनको भण्डारा–गल्छी हुँदै त्रिशुली बेत्रावती–मैलुङ–स्याफ्रबेसी मार्ग सञ्चालन हुँदा चीन र भारतबीचको दुरी दुई सय ३० किलोमिटर हुनेछ ।
