दक्षिण कोरियामा आयोजित ओलम्पिक खेलमा उत्तर कोरिया पनि सहभागी हुने
दक्षिण कोरियामा आयोजित शीतकालीन ओलम्पिक खेलमा उत्तर कोरियाले पनि आफ्नो सहभगिता रहने बताएको छ। दुई कोरियाबीच मंगलबार भएको वार्तापछि उत्तर कोरियाले यस्तो पुष्टि गरेको हो । उत्तर कोरियाले आफ्ना खेलाडी र प्रतिनिधिहरू फेबु्रअरीमा हुन लागेको शीतकालीन ओलिम्पिमा सहभागी हुन पठाउने स्पष्ट पारेको छ ।
खेलकुदका लागि दक्षिण आउने उत्तर कोरियाली टोलीमा खेलाडी, प्रतिनिधि र समर्थकका साथै अन्य नागरिक पनि हुने उत्तर कोरियाको वार्ता टोलीका एकजना सदस्यले जानकारी दिए । उनीहरूबीच भएको वार्तामा ओलम्पिक खेलकुदका विषयमा छलफल भएको थियो । दुई कोरियाबीचको उच्चस्तरिय वार्तापछि यो टुंगो लागेको हो ।
छलफलका विषयवस्तुको सीमितता रहेको बताइएको छ । उनीहरूको छलफल शीतकालीन ओलम्पिकमा उत्तर कोरियाका खेलाडीहरूलाई कसरी सहभागी गराउने भन्नेबारे बढी केन्द्रित भएको थियो। यस बैठकको निष्कर्षका बारेमा केही बताइएको छैन । उत्तर कोरियाले भने खेलकुदमा सहभागी हुने जानकारी शुरुमै गराएकाले वार्ताको वातावरण राम्रो बनेको थयो।
