कांग्रेस, राजपा, फोरम सहित ६ दलको समानुपातिक सूचीमा त्रुटि
काठमाडौँ : निर्वाचन आयोगले ६ राजनीतिक दललाई प्रदेशसभाको समानुपातिकतर्फ निर्वाचित गर्न प्रस्तावित नामावली सच्याउन पत्राचार गरेको छ । आयोगले सातवटै प्रदेशसभाको समानुपातिकतर्फको २ सय २० सिटको परिणाम पुस ७ गते घोषणा गरेको थियो ।
आयोगका प्रवक्ता सहसचिव दिनेश घिमिरेले कानुनअनुसार समावेशी क्लस्टर नमिलेको र क्रम मिचिएर नामावली पठाइएका राजनीतिक दललाई सच्याउन पत्राचार गरिएको बताए । प्राप्त मतअनुसार १३ राजनीतिक दलले प्रदेशसभामा समानुपातिक सिट पाएका छन् । आयोगले दिएको पुस १४ को समयसीमाभित्र ती दलले आफूले पाएको सिटमा निर्वाचित गर्नुपर्ने उम्मेदवारहरुको नामावली पठाएका थिए ।
आयोगको सोमबार बसेको बैठकले नेपाली कांग्रेस, राष्ट्रिय जनता पार्टी नेपाल, संघीय समाजवादी फोरम नेपाल, राष्ट्रिय जनमोर्चा, संघीय लोकतान्त्रिक राष्ट्रिय मञ्च र राष्ट्रिय प्रजातन्त्र पार्टीलाई कानुनअनुसार सूची मिलाएर पठाउन पत्राचार गर्ने निर्णय गरेको हो । ती दलले पठाएको नामावलीमा समावेशी समूह नमिलेको, क्रम मिचिएको, महिलाको अनुपात नमिलाइएको जस्ता त्रुटिी देखिएको छ । आयोगले ती दललाई त्रुटि सच्याउन तीन दिनको समय दिएको छ ।
