म काठमाडौं पुगेपछि सरकार निर्माणको गृहकार्य सुरु हुन्छ : प्रचण्ड
काठमाडौं : माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूहरु काठमाडौं पुगेपछि नयाँ सरकार निर्माणको गृहकार्य सुरु हुने बताएका छन् । कमरेड ओलीसँग दिनदिनै जसो फोनमा कुराकानी भइरहेको छ, कुराकानीमा चुनावबारेमात्र कुराकानी हुन्छ,’ चितवनमा रहेका अध्यक्ष प्रचण्डले भने, ‘सरकार निर्माणबारे चाहिँ हामीबीच भेट भएपछि मात्र कुराकानी हुनेछ ।’ आफू विहीबार बिहान काठमाडौं आइपुग्ने बताउँदै प्रचण्डले त्यसपछि सरकार निर्माणबारे गृहकार्य हुने बताए।
आआफ्नो निर्वाचन क्षेत्रमा विजय हासिल गरेका एमाले अध्यक्ष केपी शर्मा ओली र माओवादी केन्द्रका अध्यक्ष ‘प्रचण्ड’ दुबै काठमाडौं फर्केपछि सरकार निर्माणका विषयमा कुराकानी सुरु हुने भएको छ । विजय र्यालीमा सहभागी भएपछि ओली मंगलबार साँझ काठमाडौं फर्कंदैछन् भने प्रचण्ड विहीबार विहानमात्र काठमाडौं आइपुग्नेछन् ।
चितवन–३ को अन्तिम परिणाम सोमबार दिउसोमात्र आएकाले प्रचण्डले थप दुई दिन त्यहीँ रहने योजना बनाएका छन् । उनी आज र भोलि चितवन–३ अन्तर्गतका सबै वस्तीहरुमा पुगेर मतदातालाई धन्यवाद दिने योजनामा छन् । निर्वाचन सम्पन्न भएलगत्तै चितवन–२ मा पर्ने भरतपुर महानगरपालिका–१० स्थित छोरी रेणुको निवासमा बस्दै आएका उनी मतदातालाई धन्यवाद ज्ञापन गर्न फेरि शिवनगरको लाहुरेचोक सरिसकेका छन् ।
