बम आक्रमणमा परि उम्मेदवार सहित ४ जना घाइते
उदयपुर : अज्ञात समुहले गरेको बम प्रहारबाट उदयपुरमा नेपाली कांग्रेसका उम्मेदवार नारायण बहादुर कार्कीसहित ४ जना घाइते भएका छन् ।
उदयपुर गढी–६ मा नेपाली कांग्रेसको चुनावी प्रचार टोलीलाई लक्षित गरी बम प्रहार भएको हो । बम प्रहारबाट घाइते हुनेहरुमा राजन कार्की, धनमाया धौलाकोटी र निरा कटुवाल रहेका छन् ।
घाइते कार्कीको अवस्था गम्भीर रहेको बताइएको छ । कार्कीलाई हेलिकप्टरबाट काठमाडौं पठाउने तयारी भइरहेको छ । अहिले प्रहरीले सुरक्षा अवस्था कडा बनाएको छ ।
