भारतलाई सधै तनाव दिने इस्लामवादी नेता हाफिज सइद रिहा
अमेरिकाले एक करोड डलर मूल्य इनाम घोषणा गरेका पाकिस्तानका एक जना उच्च इस्लामवादी नेता हाफिज सइद अदालतको आदेशपछि नजरबन्दबाट मुक्त भएका छन् । उनले नेतृत्व गरेको एउटा प्रतिबन्धित संस्था जमात उद दावाले उनको रिहाई लगत्तै एउटा भिडियो सार्वजनिक गरेको छ जसमा सइदले भारतले लगाएको आरोप गलत भएको बताएका छन् ।
संयुक्त राज्य अमेरिका र भारतले ९ वर्षअघि १ सय ६० जना भन्दा बढी मारिने गरी भारतको मुम्बइ शहरमा भएका श्रृखंलाबद्ध आक्रमण सहितका उग्रवादी गतिविधिको योजना बुनेको आरोप सइदमाथि लगाउँदै आएका छन् । उनले भारत प्रशासित कश्मिरको स्वतन्त्रताका लागि पाकिस्तानी नागरिकहरुलाई साथ दिने प्रतिबद्धता पनि जनाएका छन् ।
यसै हप्ता पाकिस्तानी अदालतले सइद सार्वजनिक सुरक्षाका लागि जोखिम रहेको भन्ने सरकारी तर्कलाई अस्वीकार गर्दै उनलाई रिहा गर्न आदेश दिएको थियो।
मुम्बइमा सन् २००८ मा बन्दुकधारीहरुले गराएका योजनाबद्ध आक्रमणमा १६० जना भन्दा बढीको मृत्यु भएको थियो ।
सो हमलामा आफ्नो संलग्नता नरहेको उनले बताउने गरेका छन् । ती धार्मिक नेतालाई उत्तरपूर्वी पाकिस्तामा अवस्थित लहोरमा बिहीबार साँझ रिहा गरिएको थियो । रिहाइ लगत्तै दिएको भिडियो सन्देशमा उनले भनेका छन्, भारतले सधैँ आतंकवादीको आरोप लगाएपनि उच्च अदालतको आदेशले भारतीय प्रचार झुट्टो रहेको पुष्टि गरेको छ।
