विपन्नलाई ठण्डीबाट बचाउन पूर्वतयारी गर्न प्रधानमन्त्रीको ध्यानाकर्षण
काठमाडौँ । नेकपा एमाले केन्द्रीय विपद् व्यवस्थापन तथा स्वयंसेवा विभागले ठण्डी र चिसोबाट विपन्न र बाढी पहिरो प्रभावितलाई सुरक्षित हुने व्यवस्था मिलाउन प्रधानमन्त्रीको ध्यानाकर्षण गराएको छ ।
विभाग प्रमुख खिमलाल भट्टराई नेतृत्वको टोलीले सोमबार प्रधानमन्त्री केपी शर्मा ओलीलाई भेटेर ध्यानाकर्षणपत्र बुझाएको हो ।
‘शीतलहरको कहरबाट बचाउन मुख्यतः तराई मधेसका वस्तीहरू, देशैभरिका विपन्न जनताका वस्तीहरू र भूकम्प तथा बाढी र पहिरो पीडित जनसमुदायहरूलाई ठण्डी मौसमबाट सुरक्षित राख्न नेपाल सरकारले पूर्व तयारी गर्न जरुरी छ’, प्रधानमन्त्रीलाई बुझाएको ज्ञापनपत्रमा भनिएको छ ।
‘यी कामहरूमा सरकारले पर्याप्त ध्यान देओस् र पूर्वतयारी गरोस् भन्नका लागि यो ध्यानाकर्षणपत्र सम्माननीय प्रधानमन्त्रीज्यूसमक्ष पेस गरेका छौँ’, विभागले भनेको छ ।
प्रधानमन्त्रीले ध्यानाकर्षणलाई सकारात्मक रुपमा लिएको नेता भट्टराईले जानकारी दिए ।
