रवि लामिछानेलाई चौथो पटक म्याद थप, १३ दिन थुनामा राख्न अदातलकाे अनुमति
सहकारीको रकम अपचलन मुद्दामा पक्राउ परेका राष्ट्रिय स्वतन्त्र पार्टीका सभापति रवि लामिछानेमाथि चौथो पटक म्याद थप गरिएको छ । जिल्ला अदालत कास्कीका न्यायाधीश नवराज दाहालको इजलासले लामिछानेमाथि थप १३ दिन थुनामा राखेर अनुसन्धान गर्न अनुमति दिएको हो ।
यसअघि तीन पटकसम्म थपिएको म्याद सकिएसँगै कास्की प्रहरीले आइतबार पुनः म्याद थपको माग गर्दै अदालत पेश गरेको थियो। अदालतले उनलाई थप हिरासतमा राखेर अनुसन्धान गर्न अनुमति दिएको हो ।
गत कात्तिक २ गते काठमाडौँबाट पक्राउ परेका रवि लामिछानेमाथि पहिलो पटक ५ दिनको म्याद थप गरिएको थियो भने दोस्रोपटक ७ दिनको म्याद थपेर अनुसन्धान गरिएको थियो । त्यस्तै तेस्रोपटक १० दिनको म्याद थप गरेर अनुसन्धान गरेको प्रहरीले पुनः म्याद थप गर्न आइतबार अदालत पेश गरेको थियो ।
कास्की प्रहरीले सहकारी रकम अपचलनसँगै सम्पत्ती सुद्धिकरण, संगठित अपराधमा समेत लामिछानेमाथि अनुसन्धान गरिरहेको छ ।
