मानव तस्करीको आरोपमा पक्राउ परेका अधिकारीलाई काठमाडौं ल्याइँदै
मानव तस्करीको आरोपमा पक्राउ परेका पुर्व मन्त्री तथा नेकपा (एमाले) का नेता लिलाबल्लभ अधिकारीलाई काठमाडौं ल्याइने भएको छ ।
जिल्ला प्रहरी परिसर काठमाडौंले जिल्ला प्रहरी कार्यालय मोरङलाई अधिकारीलाई काठमाडौं पठाइदिन भन्दै पत्राचार गरेको छ ।
कोशी प्रदेशका पूर्व आन्तरिक मामिला तथा कानुनमन्त्री समेत रहेका अधिकारीले मन्त्रालयसँग असम्बन्धित मान्छेहरु लिएर जापान पुगेका थिए ।
तत्कालीन मन्त्री अधिकारीसहित ४ जनालाई जापानको अध्यागमन विभागले नेपाल नै फिर्ता पठाइदिएपछि उनी विवादमा तानिएका थिए ।
पूर्वमन्त्री अधिकारीसँग जापान पुगेका ३ जना युवासहित ६ जनालाई प्रहरीले पक्राउ गरेर अनुसन्धान गरिरहेको छ । अधिकारीले मन्त्री पदबाट राजिनमा दिइसकेका छन् भने उनलाई एमालेले निलम्बन गरेको छ ।
प्रहरीको हिरासतमा रहेका युवाहरुले आफूहरु १० लाखदेखि १३ लाख रुपैयाँ तिरेर मन्त्री अधिकारीसँग जापान गएको बयान दिएका छन् ।
अधिकारीलाई पार्टीले पनि कारबाही गरिसकेको छ । मुद्दाको अन्तिम किनारा नलागेसम्मका लागि अधिकारीलाई एमालेले सबै जिम्मेवारीबाट मुक्त गराएको छ ।
उनलाई आज नै जहाजमार्फत काठमाडौं ल्याउने तयारी रहेको बताइएको छ ।
