करार कर्मचारीलाई कात्तिकको तलब दिएर बिदा गर्ने पोखरा महानगरको निर्णय
पोखरा । पोखरा महानगरपालिकाले करारका कर्मचारीलाई कात्तिक महिनासम्मको तलब दिएर बिदा दिने निर्णय गरेको छ ।
महानगरको कार्यपालिका बैठकले अन्तिम पटक कात्तिकसम्मको म्याद थपेको हो । यसअघि पुसमा बसेको बैठकले साउन १ गतेदेखि बिदा गर्ने निर्णय गरेको थियो । तर एमालेले सहमति नगरेपछि पुनः असोजसम्मको म्याद थपिएको थियो ।
वडा नम्बर १३ का वडाध्यक्ष किरण बरालका अनुसार कात्तिकपछि करार कर्मचारीको म्याद थप हुनेछैन । `बैठकले सर्वसम्मत निर्णय गरेको छ । अब कात्तिक मसान्तपछि उहाँहरू बिदा हुनुहुन्छ,´ उनले भने ।
कांग्रेसले करार कर्मचारी ननिकाले ताला लगाउने चेतावनी दिएको थियो । त्यसपछि बैठक बसेको हो ।
