स्विफ्टको समस्याले ग्राहकलाई कुनै क्षति नगर्ने NIC एसियाको स्पष्टोक्ति
एनआईसी एसिया बैंकले स्वीफ्ट ह्याकिङबाट बैंकिङ कारोबारमा कुनै समस्या नआएको बताएको छ। स्वीफ्टमा देखिएको समस्याले बैंक र ग्राहक कसैलाई क्षति नहुने बैंकले स्पष्ट पारेको छ । बैंकको स्वीफ्ट ह्याक गरी विदेशी खातामा रहेको रकम चोरी भएको आशंकामा नियामक राष्ट्र बैंकले अध्ययन गरिहेको छ । स्वीफ्ट बैंकको ‘क्रस बोर्डर’ कारोबार गर्ने सर्भर हो ।
अहिलेको समस्या एनआईसी एसिया बैंकले विदेशी बैंक खातामा राखेको रकम चोरी गर्न खोजिएको हो । बैंकका डेपुटी सिइओ रोशन पौडेलका अनुसार शनिबार बैंकको स्वीफ्टमा समस्या देखिएको जानकारी प्राप्त भएको हो । स्वीफ्टमा समस्या आएको हुनाले बैंकले आइतबार सर्भर डाउन गरेर कारोबार गरेन ।
नयाँ सर्भर डाउनलोड गरी सोमबारदेखि नै स्वीफ्ट कारोबार सुरु भइसकेको उनले बताए । स्वीफ्ट बाहेकको सबै बैंकिङ सेवा आइतबारदेखि नै सञ्चालन भइरहेको छ । राष्ट्र बैंकले आइतबारदेखि नै बैंकमा टोली खटाएर स्वीफ्ट ह्याकको अध्ययन गरिरहेको छ ।
यस्तै, एनआइसी एसिया बैंकले पनि भारतबाट विज्ञ झिकाएर अनुसन्धान गरिरहेको छ। यही हप्ता स्वीफ्टको पूर्ण विवरण आइसक्ने बैंकले जनाएको छ । नियामक राष्ट्र बैंकले पनि स्वीफ्ट ह्याकले बैंकको कारोबारमा कुनै समस्या नआउने स्पष्ट पारिसकेको छ ।
ग्राहक बैंकिङ कारोबारमा ढुक्क भएर लाग्दा हुने राष्ट्र बैंकको भनाई छ । बैंकले स्वीफ्टमा समस्या आएको जानकारी गराएपछि राष्ट्र बैंकको विज्ञ टोली फिल्डमै पुगेर अनुसन्धानमा खटिएको छ । डेपुटी सिइओ पौडेलले बैंकका देशभरका सबै शाखाहरु आइतबार, सोमबार, मंगलबार पूर्ण रुपमा चलेको र सबै बैंकिङ सेवा ग्राहकलाई दिएको बताए ।
