केन्द्रीय सत्ता समीकरण फेरिँदा बागमती प्रदेशमा राजनीतिक सङ्कट बढ्ने

नेपाली कांग्रेस बागमती प्रदेश संसदीय दलका उपनेता रामकृष्ण चित्रकारका अनुसार सत्ता समीकरणका विषयमा अहिले नै ठोस निष्कर्ष दिन उचित हुँदैन । राजनीतिमा सम्भावना र विकल्प धेरै रहेकाले अहिले नै केही भन्न सक्ने अवस्था नरहेको उनले बताए ।

यता एकीकृत समाजवादी भने केन्द्रीय समीकरण अनुसार प्रदेश सरकारको समीकरण निर्माण गर्नुपर्ने पक्षमा छ । सो पार्टीका एक नेताका अनुसार केन्द्रमा बनेको नयाँ समीकरणको सरकारमा एकीकृत समाजवादी सहभागी हुने छैन । सोही अनुसार प्रदेशको समीकरण बनाएर अघि बढ्नुपर्ने उनले बताए । बागमती प्रदेशमा फरक धारको सत्ता समीकरण बनाउन दलहरू अघि बढ्नुपर्ने उनको भनाइ छ ।

नेकपा एमाले बागमती प्रदेश संसदीय दलका प्रमुख सचेतक मधुसूदन पौडेलले प्रदेश सरकार परिवर्तनको सम्भावना प्रबल रहेको बताए । केन्द्रकै समीकरण अनुसार प्रदेश सरकार बनाउने सम्भावना रहे पनि सङ्ख्यात्मक विषय निर्णायक हुने उनको भनाइ छ ।

बागमती प्रदेशमा केन्द्रीय सरकारको जस्तो सहज अवस्था नरहेकाले सङ्ख्यात्मक रूपमा केन्द्रीय समीकरण अनुसार अघि बढ्ने विषयमा छलफल गरेर अघि बढ्ने उनको भनाइ छ ।

पौडेल बागमतीमा नयाँ समीकरण अनुसार सरकार बनाउन पर्याप्त सङ्ख्या नभएकाले राप्रपा वा समाजवादीलाई मिलाएर अघि बढ्नुपर्ने अवस्था रहेको बताउँछन् ।

• हामी आन्दोलनमा छौँ : राप्रपा

राप्रपा बागमती प्रदेश संसदीय दलका नेता उद्धव थापाले सरकार परिवर्तनमा आफूहरूलाई खासै चासो नरहेको बताए । विगतमा हतारमा निर्णय गर्दा २ महिनामै सरकार ढलेको बताउँदै उनले केन्द्रको सरकार परिवर्तन र प्रदेशको समीकरणका विषयलाई आफूहरूले हेरिरहेको तर कुनै योजना नबनाएको प्रस्ट पारे ।

नागरिकले राप्रपालाई प्रतिपक्षको भूमिका दिएको र सोही अनुसार जनताको मुद्दा लिएर राप्रपा आन्दोलनमा होमिएको उनको भनाइ छ ।

‘हामी सरकार र सत्ता समीकरणको जोडघटाउ हेरिरहेका छौँ । अहिले नै हतार गरेर अघि बढ्नु हुन्न भन्ने हाम्रो निष्कर्ष हो,’ उनले भने, ‘विगतमा हतार गर्दा २ महिना पनि टिक्न सकेनौँ । हामीलाई जनताले प्रतिपक्षको भूमिकाको म्यान्डेट दिएका छन् । त्यसैले सरकार र सत्ता समीकरणका विषयमा योजना बनाएका छैनौँ । हामी आन्दोलनमा छौँ ।’

• निर्णायक भूमिकामा राप्रपा

बागमती प्रदेश सरकार गठनका लागि नयाँ गठबन्धनमा राप्रपा निर्णायक शक्तिको रूपमा देखिएको छ । राप्रपा नयाँ गठबन्धनसँग मिल्दा सहजै सरकार गठन हुन सक्छ भने कांग्रेससँग तालमेल गरेको खण्डमा पनि सरकार गठनमा बहुमत पुग्न सक्छ ।

• के के छन् विकल्प ?

१. एमाले, माओवादी र राप्रपाको तालमेल

बागमती प्रदेशमा एमालेका २७, माओवादी केन्द्रका २१ र राप्रपाका १३ सांसद छन् । यी तीन दल मिलेको खण्डमा सहजै सरकार गठन हुन सक्छ ।

२. कांग्रेस, एकीकृत समाजवादी र राप्रपाको सहकार्य

सरकार गठनको दोस्रो विकल्पमा कांग्रेसले एकीकृत समाजवादी र राप्रपासँग सहकार्य गर्न सक्छ । सरकार गठनका लागि आवश्यक ५६ जनामध्ये कांग्रेससँग ३७ सांसद छन् । कांग्रेसलाई अन्य १९ जना सांसदको समर्थन आवश्यक हुन्छ । यी तीन दल मिल्दा सरकार गठनका लागि ५७ जना सांसदको साथ हुने देखिन्छ ।

३. कांग्रेस र एमाले तालमेल

बागमती प्रदेशमा कांग्रेस र एमालेबिच तालमेल भएको खण्डमा पनि सरकार बन्न सक्छ । कांग्रेस र एमाले मिल्दा बागमती प्रदेशसभामा ६४ जना सांसद पुग्छन् । यस विकल्पको सम्भावना भने अत्यन्त न्यून देखिन्छ ।

४. कांग्रेस र माओवादी केन्द्रको सहकार्य

सरकार गठनका लागि कांग्रेस र माओवादी केन्द्रको तालमेल पनि विकल्प हुन सक्छ । यी २ दलको सहकार्यमा सहजै बहुमत पुग्छ । कांग्रेससँग ३७ र माओवादीसँग २१ गरी जम्मा ५८ सांसदको समर्थनमा नयाँ सरकार गठन हुन सक्छ ।

केन्द्रमा एमालेसँग सहकार्य गरेको माओवादीले प्रदेशका लागि कांग्रेससँगै सहकार्य गर्ने सम्भावना भने कम छ ।