आयात निर्यातसँगै घट्यो ब्यापार घाटा
चालु आर्थिक वर्ष २०८०–०८१ को पहिलो चार महिनामा आयात निर्यातसँगै व्यापारा घाटा पनि घटेको छ । साउन देखि कार्तिकसम्मको आयात निर्यातमा अघिल्लो वर्षको सोहि अवधिको तुलनामा ३.३४ प्रतिशतले व्यापार घाटा घटेको छ ।
गत आर्थिक वर्षको सोही अवधिमा आयात निर्यातमा कमि आएसँगै व्यापार घाटा घट्न पुगेको हो । यो चार महिनामा ५ खर्ब १२ अर्ब ५० करोड ३४ लाख ७४ हजार रुपैयाँ बराबरको बस्तु आयात भएको छ ।
गत आर्थिक वर्षको सोही अवधिको तुलनामा ३।७९ प्रतिशतले कम हो । गत वर्षको कात्तिकसम्म ५ खर्ब ३२ अर्ब ६९ करोड १३ लाख ८१ हजारको आयात भएको थियो ।
आर्थिक वर्षको सोही अवधिमा ५० अर्ब ५६ करोड ५३ लाख रुपैयाँ बराबरको बस्तु तथा सेवा नेपालबाट निर्यात भएको छ । निर्यात पनि गत वर्षको सोही अवधिको तुलनामा ७.६८ प्रतिशतले कम हो । गत वर्षको पहिलो चार महिनामा ५४ अर्ब ७७ करोड ४३ लाख १६ हजार रुपैयाँ बराबरको निर्यात भएको थियो ।
यसरी यो ४ महिनामा नेपालले १४५ देशसँग कारोबार गर्दा ४ खर्ब ६१ अर्ब ९३ करोड ८० लाख रुपैयाँ ब्यापार घाटा भएको छ । अघिल्लो आर्थिक वर्षको सोहि अवधिमा नेपालको ब्यापार घाटा ४ खर्ब ७७ अर्ब ९१ करोड थियो ।
