बेपत्ता पनडुब्बीमा १० घण्टाभन्दा कम अक्सिजन बाँकी
विश्वको सबैभन्दा प्रसिद्ध जहाज टाइटानिकको भग्नावशेष देखाउनका लागि गहिरो समुद्रमा लिएर जाने पनडुब्बीमा अब सम्भवतः १० घण्टाका लागि मात्रै अक्सिजन बाँकी छ ।
गत आइतबारदेखि हराइरहेको यो पनडुब्बीको खोजीमा अन्तर्राष्ट्रिय स्तरमा उद्धार अभियान चलिरहेको छ ।
तर अहिलेसम्म यसको स्थान र त्यहाँका मानिसको अवस्थाबारे केही थाहा हुन सकेको छैन ।
यो पनडुब्बीमा १० घण्टाभन्दा कम अक्सिजन मात्र बाँकी रहेको विश्वास गरिन्छ । यसै कारण हरेक पलसँगै बचाउ अभियानमा संलग्न मानिसका लागि चुनौती बढ्दै गइरहेको छ ।
क्यानडाको मेमोरियल युनिभर्सिटीसँग सम्बन्धित हायपरबेरिक मेडिसिन विशेषज्ञ डा. केन लेडजले बीबीसीसँगको कुराकानीमा पनडुब्बीमा सवार मानिसका लागि तीव्र रूपमा समाप्त हुँदै गएको अक्सिजन मात्रै एक मात्र सङ्कट नभएको बताएका छन् ।
यो पनडुब्बीमा बिजुली जान सक्ने आशङ्का गरिएको छ । पनडुब्बी भित्र बिजुली द्वारा अक्सिजन र कार्बन डाइअक्साइडको मात्रा नियन्त्रण गरिन्छ भन्ने विश्वास गरिन्छ ।
यही कुराले जोखिम बढाइरहेको छ, किनकि अक्सिजनको मात्रा घट्दै जाँदा पनडुब्बीमा रहेका मानिसहरूले प्रत्येक साससँगै छोड्ने कार्बनडाइअक्साइडले पनडुब्बीमा पहिले देखि नै भएको कार्बनडाइअक्साइडको मात्रा बढाउँदै जानेछ ।
र यसले उनीहरुको जीवनका लागि थप खतरा पैदा गर्न सक्छ ।
उनी भन्छन्, ‘कार्बन डाइअक्साइडको मात्रा बढ्दै जाँदा यो एक नशालु ग्यासजस्तै हुनेछ । यसले एक एनेस्थेटिक ग्यासको रूपमा काम गर्नेछ र तपाईँलाई निद्रा लाग्नेछ ।’
मानिसको रगतमा यो ग्यासको मात्रा बढी हुनुलाई हाइपरक्याप्निया भनिन्छ । यस्तो अवस्थामा उपचार नपाए मानिसको ज्यान नै जान सक्छ ।
यससँगै अत्यधिक चिसोका कारण पनडुब्बीमा सवार यात्रु हाइपोथर्मियाको सिकार हुने जोखिम पनि बढेको छ ।
यस पनडुब्बीमा पाकिस्तानी अर्बपति राजकुमार दाउद, उनका छोरा सुलेमान, बेलायती व्यापारी हमिस हार्डिङसहित पाँच जना सवार छन् ।
