क्वार्टरफाइनलमै हारे २२ पटकका ग्रान्डस्लाम च्याम्पियन योकोभिच
प्रभावशाली सर्बियन खेलाडी नोभाक योकोभिच इटालियन ओपन टेनिसको क्वार्टरफाइनलमै पराजित भएका छन् । पहिलो बरियतामा आसिन योकोभिचलाई क्वार्टरफाइनलमा डेनमार्कका २० वर्षीय युवा खेलाडी होल्गर रुनेले हराएका हुन् ।
सातौं वरीयताका होल्गर उक्त खेलमा ६-२, ४-६, ६-२ अंकले विजयी भए । इटालियन ओपनलाई निकट भविष्यमा सुरु हुने ग्रान्डस्लाम प्रतियोगिता फ्रेन्च ओपनको तयारीका रुपमा लिइन्छ । फ्रेन्च ओपनअघि ३५ वर्षीय योकोभिचको पराजय यतिबेला विश्व टेनिसमा चर्चाको विषय बनेको छ ।
फ्रेन्च ओपन मे २८ तारिखमा सुरु हुँदैछ । योकोभिचले हालसम्म २ पटक फ्रेन्च ओपनको उपाधि जितेका छन् । उनले सन् २०१६ र सन् २०२१ मा फ्रेन्च ओपन जितेका थिए । उनले सबैभन्दा कम उपाधि जितेको ग्रान्डस्लाम प्रतियोगिता पनि फ्रेन्च ओपन नै हो ।
योकोभिच सन् २०१३ पछि पहिलो पटक इटालियन ओपनको क्वार्टरफाइनलमा पराजित भएका हुन् । योकोभिच कीर्तिमानी रुपमा २२ पटक ग्रान्डस्लाम प्रतियोगिताको एकल उपाधि जित्ने खेलाडी हुन् । उनसँगै राफेल नाडालले पनि २२ पटक ग्रान्डस्लामको एकल उपाधि जितेका छन् ।
उनले हालसम्म ६ पटक इटालियन ओपनको उपाधि चुमेका छन् । प्रतियोगिताको सेमिफाइनलमा अब होल्गरले चौथो वरीयतामा आसिन नर्वेजियन खेलाडी कास्पर रुडको सामना गर्नेछन् । योकोभिच पछिल्लो केही समययता घाइते समस्याबाट पीडित छन् ।
आफ्नो कुइनोको समस्याका कारण उनले हालै म्याड्रिड ओपन पनि खेल्न सकेनन् । योकोभिच यसपटक फ्रेन्च ओपनको उपाधि जितेर नाडाललाई पछि पार्ने धुनमा थिए । तर, प्रतियोगिता सुरु हुनुअघि नै उनको लय खस्किएको छ ।
