पाकिस्तानमा भारतीय च्यानल प्रसारण गर्ने ५० केबल अपरेटरका उपकरण जफत
भारतको टिभी च्यानल देखाउने पाकिस्तानका ५० भन्दा बढी केबल अपरेटरलाई कारबाही गरिएको छ । यसअन्तर्गत उनीहरुको उपकरण जफत गरिएको छ । बरामद गरिएका उपकरणमा १४ स्याटेलाइट रिसिभर, ११ मोड्युलेटर, ५ ट्रान्समिटर र २ डिजिटल बक्स रहेका छन् ।
समाचार एजेन्सी पीटीआईका अनुसार पाकिस्तान इलेक्ट्रोनिक मिडिया रेगुलेटरी अथोरिटी (पेमरा) ले बिहीबार यी च्यानलहरूमा यो कारबाही गरेको हो । पेमराले पाकिस्तानमा इलेक्ट्रोनिक मिडियालाई मात्र निगरानी गर्छ । बिहीबार जारी गरेको विज्ञप्तिमा भनिएको छ, ‘पेमराका टोलीहरूले पाकिस्तानका सात शहरहरू – लाहोर, मुल्तान, फैसलाबाद, सरगोधा, गुजरनवाला, कराची र हैदरावादको आकस्मिक भ्रमण गरेपछि यो कारबाही गरेको हो ।’
यसअघि पेमराले भारतीय च्यानलहरूको सामग्री प्रसारण गरेपछि केबल अपरेटरहरूलाई फेरि पनि आदेश उल्लङ्घन गरेको पाइएमा कडा कारबाही गरिने चेतावनी दिएको थियो ।
