घरमै फेला परे, अपहरणमा परेको भनिएका बालक
रुपन्देही : सैनामैनाबाट अपहरणमा परेको भनिएका एक बालक आफ्नै घरमा फेला परेका छन् । अपरिचित समूहले मंगलबार दिउँसो सैनामैना नगरपालिकाको सालझुण्डीबाट १४ वर्षीय विवेक कार्कीलाई अपहरण गरेको खबर प्रहरीसमक्ष पुगेको थियो ।
कार्की बुटवलको उपमहानगरपालिका निवासी हुन् । जिल्ला प्रहरी कार्यालय रुपन्देहीका डीएसपी बेलबहादुर पाण्डेका अनुसार आमासँग हिँडिरहेको बेला अपरिचित समूहले विवेकलाई सेतो कारमा हालेर अज्ञात स्थानतर्फ लगेको थियो ।
तर, त्यसको केही घण्टापछि बालक आफ्नै घरभित्र फेला परेको पाण्डेले बताए । डीएसपी पाण्डेले घटनाको अनुसन्धान भइरहेको जानकारी दिए ।
