सप्तरीमा ३ पालिकामा खुम्चियो जसपा : उपेन्द्रकै निर्वाचन क्षेत्रमा पनि पराजित
संघीय र प्रदेश सरकारको सत्तारुढ गठबन्धनको एक घटक जनता समाजवादी पार्टी (जसपा) मधेश प्रदेश स्थित सप्तरी जिल्लामा ३ ओटा पालिकामा खुम्चिएको छ ।
अध्यक्ष उपेन्द्र यादवको निर्वाचन क्षेत्र समेत यो पार्टीलाई ठूलो क्षति भएको छ । २०७४ सालको निर्वाचनमा ५ पालिका जितेको जसपा यसपटक ३ सिट मात्रै जितेको छ ।
तत्कालिन संघीय समाजवादी फोरम नेपालले जिल्लाको खडक, बोदे बर्साइन नगरपालिका तथा महादेवा, तिरहुत र बलान बिहुल गाउँपालिका जितेको थियो ।
संघीय समाजवादी फोरम र तत्कालिन राजपा मिलेर जसपा बन्दा पूर्व राजपाबाट जितेका ५ मध्ये ४ पालिका प्रमुख जसपामै रहेका थिए ।
यस्तै, डा. बाबुराम भट्टराई नेतृत्वको नयाँ शक्ति जसपामा मिल्दा सो पार्टीले जितेको एक पालिका पनि जसपाकै भागमा परेको थियो ।
तत्कालिन राजपाले जितेको हनुमाननगर कंकालिनी, डाक्नेश्वरी राजविराज नगरपालिका र रुपनी गाउँपलिकाका प्रमुख जसपामै रहे ।
नयाँ शक्तिले जितेको छिन्नमस्ता गाउँपालिका प्रमुख पनि जसपामै आए । यसरी हेर्दा १० पालिका जसपाको थियो ।
तर, यस पटकको चुनावमा जसपाले मात्र तीन पालिका जितेको छ । यस पटक जसपाले राजविराज, बोदे बर्साइन नगरपालिका र विष्णुपुर गाउँपलिका जितेको छ ।
राजविराज र बोदे बर्साइनमा प्रमुख र उपप्रमुख दुबै जितेपनि बिष्णुपुरमा प्रमुख पद मात्रै जितेको छ । यहाँको उप प्रमुखमा कांग्रेस विजयी भएको छ ।
पार्टीका अध्यक्ष उपेन्द्र यादवले जितेको क्षेत्र हो सप्तरी क्षेत्र नम्बर २ । सदरमुकाम राजविराजसहित महादेवा, तिलाठी कोइलाडी र छिन्नमस्ता गाउँपालिका गरी ४ वटा पालिका यो क्षेत्रमा पर्दछ ।
तर, राजविराजबाहेक कुनै पनि पालिकामा जसपा विजयी हुन सकेन । राजविराजमा जसपाका भीमराज यादव प्रमुखमा निर्वाचित भएका छन् ।
तिलाठी कोइलाडी गाउँपालिकाको अध्यक्ष र उपाध्यक्ष दुबै पदमा कांग्रेस, महादेवाको अध्यक्ष र उपाध्यक्ष दुबै पदमा लोकतान्त्रिक समाजवादी पार्टी (लोसपा) विजयी भएको छ ।
छिन्नमस्तामा पनि अत्यधिक मतका साथ लोसपाका उम्मेदवारले अग्रता लिएका छन् । यहाँ दोस्रो नम्बरमा नेकपा माओवादी केन्द्रका उम्मेदवार छन् ।
