प्राधिकरणद्वारा बक्यौता नतिर्ने सात वायुसेवा कम्पनीलाई कालोसूचीमा राख्ने चेतावनी
सरकारलाई बक्यौता नतिर्ने सात वायुसेवा कम्पनीलाई प्राधिकरणद्वारा कालोसूचीमा राख्ने चेतावनी दिएको छ । बक्यौता नागरिक उड्डयन प्राधिकरण ऐन, २०६७ अनुसार असुल गरी ती कम्पनी र व्यक्तिलाई हवाई सेवा, विमानस्थल तथा प्राधिकरणसँग सम्बद्ध कुनै काम तथा व्यापार गर्न नपाउने गरी कालोसूचीमा राख्ने चेतावनी दिइएको हो ।
नेपाल नागरिक उड्डयन प्राधिकरणले रकम बुझाउन पटक-पटक पत्राचार गरी तीन पटक सार्वजनिक सूचनासमेत जारी गरिए पनि अटेरी गरिएपछि पुनः सार्वजनिक सूचना जारी गरेर सात दिनभित्र ९ करोड १६ लाख बक्यौता रकम तिर्न भनेको छ ।
बक्यौता नतिर्नेमा दीपमणि राजभण्डारी अध्यक्ष रहेको नेकोन एयर, मणिन्द्रलाल रंजितकारको शिवानी एयर, प्रज्वल श्रेष्ठसहितको गोरखा एयर, प्रज्ञानसमशेर जबरासतिको माउन्टेन एयर, रवीन्द्रप्रसाद प्रधानसहितको कस्मिक एयर, आंगछिरिङ शेर्पासहितको स्काइलाइन एयरवेज र प्रज्वल श्रेष्ठसहितको एयर काष्ठमण्डप वायुसेवा कम्पनी रहेका छन् ।
प्राधिकरणका अनुसार नेकोनले ४ करोड ७२ लाख २५ हजार, शिवानीले ५५ लाख ५१ हजार,गोरखाले २० लाख ३५ हजार, माउन्टेन एयरले ६ लाख १० हजार कस्मिकले ३ करोड ४७ लाख, स्काइलाइनले ७ लाख ८० हजार र काष्ठमण्डपले ७ लाख ३८ हजार तिर्न बाँकी छ ।
