रामचन्द्र पौडेललाई सर्वसम्मत सभापति बनाउन निधिको प्रस्ताव
पार्टीको महाधिवेशन सुरु हुने दिन नेपाली कांग्रेसका नेता विमलेन्द्र निधिले वरिष्ठ नेता रामचन्द्र पौडेललाई पार्टीको सर्वसम्मत सभापति बनाउन प्रस्ताव गरेका छन् ।
चितवन-काठमाडौँ प्रजातान्त्रिक संगमले शुक्रबार जावालखेलमा आयोजना गरेको कार्यक्रममा बोल्दै निधिले पौडेललाई न्याय पनि हुने र पार्टीमा पनि एकताका सन्देश जाने भन्दै सर्वसम्मतिको प्रस्ताव राखेका हुन् ।
निधि आफैँ पनि सभापतिका उम्मेदवार हुन् ।निधिले भने, ‘पार्टीभित्र एकताको सन्देश दिन जरुरी छ । यदि पोडेललाई सर्वसम्मत सभापति बनाउने हो भने म स्वीकार गर्छु । सर्वसम्मत नभएको अवस्थामा सभापतिमा मेरो दाबी यथावत् रहन्छ ।’
निधिले यस्तो प्रस्ताव राख्दै कांगेसको सभापतिको प्रतिस्पर्धालाई नयाँ मोड दिएका हुन् ।
