प्रधानन्यायाधीले तोके १५ जना न्यायाधीशको आजको लागि इजलास
प्रधानन्यायाधीश चोलेन्द्र शम्शेर जबराले १५ जना न्यायाधीशहरुका लागि आज इजलास तोकेका छन् ।
जबराले ६ वटा संयुक्त र तीनवटा एकल इजलास तोकेका हुन् ।
कुल ९ वटा इजलासमा उनले ९ वटा बन्दी प्रत्यक्षीकरणको मुद्दामात्रै तोकेका छन् ।सर्वोच्च अदालतका असन्तुष्ट न्यायाधीशहरूले प्रधानन्यायधीश जबराले आफ्नो इजलास नतोक्न र इजलासमा बन्दी प्रत्यक्षीकरण बाहेकका निवेदन नहाल्न आग्रह गरेका थिए ।
एउटा एकल र अर्को संयुक्त इजलासमा यी सबै मुद्दा तोक्न सकिने अवस्था रहे पनि प्रधानन्यायाधीश जबराले धेरै संख्यामा इजलास सञ्चालन भएको सन्देश प्रवाह गर्न एउटा इजलासमा एउटाभन्दा बढी मुद्दा राखेका छैनन् ।
मंगलबार बैंकिङ कसुरको मुद्दा पेसीमा चढेपछि न्यायाधीशहरूले कुनै पनि मुद्दा सुनुवाइ गरेनन् । त्यसैले बुधबार आज प्रधानन्यायाधीश जबराले बन्दी प्रत्यक्षीकरणको बाहेक कुनै निवेदन पेसीमा तोकेनन् ।
भोलि बिहीबारदेखि ४ दिन तिहारको सार्वजनिक बिदा हुने छ ।
