डेल्टा भेरिएन्ट भन्दा १० प्रतिशत संक्रामक नयाँ भेरिएन्ट बेलायतमा भेटियो
बेलायतमा कोरोनाको डेल्टा भरिएन्टको फेरि अर्को नयाँ रुप विकसित भएको भन्दै सचेत रहन बैज्ञानिकहरुले सुझाव दिएका छन् ।
हालै विकसित भएको कोरोनाको नयाँ रुप डेल्टा भेरिएन्ट भन्दा १० प्रतिशत संक्रामक भएकाले बेलायत पुन कोरोना महामारीको चपेटामा पर्ने चेतावनी वैज्ञानिकहरुले दिएका हुन् ।
कोरोनाको नयाँ विकसित रुप फैलिएका कारण बेलायत कोरोना महामारीको चपेटाबाट मुक्त हुन केही समय लाग्ने वैज्ञानिकहरुले औँल्याएका छन् । कोरोना संक्रमण दर उच्च बन्दै जाँदा बेलायतमा एकै दिन २ सय २३ जनाको मृत्यु भएको छ ।
त्यहाँ एकै दिन ५० प्रतिशत कोरोना संक्रमण पुष्टि भएको छ । कोरोनाविरुद्धको दोस्रो डोज पूरा गरी बुस्टर लगाउन सुरु गरेकाहरुमा पनि कोरोना संक्रमण भएको त्यहाँका स्वास्थ्यकर्मीहरुले बताएका छन् ।
नयाँ विकसित स्वरुपको यो भेरिएन्टका कारण चिन्तित बनेको बेलायतले कोरोना नियन्त्रणमा लागि थप उपाय अवलम्बन गर्न वैज्ञानिकहरुसँग परामर्शसमेत थालेको छ । यसैबीच बेलायतका जनता नयाँ भेरिएन्ट फैलिएसँगै सचेत हुन थालेका छन् ।
मास्कसमेत लगाउन छोडेका त्यहाँका नागरिकहरुले स्वास्थ्य सतर्कता अपनाउन थालेका छन् । बेलायतमा कोरोनाका कारण एक लाख ३८ हजार भन्दा बढीको मृत्यु भइसकेको छ भने संक्रमितको संख्या ८५ लाख ४१ हजार नाघेको छ ।
