अमेरिकासँग आइएसविरुद्ध लड्न कुनै सहयोग नलिने तालिबान सरकारको घोषणा
अफगानिस्तानको तालिबान सरकारले आइएसविरुद्ध लड्न अमेरिकासँग कुनै सहयोग नलिने घोषणा गरेको छ ।
कतारको राजधानी दोहामा आयोजित अमेरिका र तालिबान प्रतिनिधिबीचको दुई दिवसीय वार्तामा तालिबानले आलंकवादविरुद्धको लडाइँमा अमेरिकी सहयोग नलिने बताएको हो ।
गत अगस्टमा अमेरिकी सेना फर्किए लगत्तै सत्ता सम्हालेको तालिबानले मुलुकमा बढ्दै गएको आतङ्कवादी गतिविधिविरुद्ध आफूहरु नै सक्षम रहेको बताएको हो ।
अफगानिस्तानबाट अमेरिकी सैनिक फिर्ता हुँदै गर्दा आईएससँग जोडिएको स्थानीय एक आतङ्कवादी सङ्गठनले झन्डै २ सय मानिसको ज्यान जाने गरी विमानस्थलमा बम आक्रमण गरेको थियो ।
बम आक्रमणपछि अमेरिकाले ड्रोन कारबाही गरेको थियो। अमेरिकी कारबाहीमा आइएसको आक्रमणका योजनाकार मारिएको अमेरिकाले बताएको थियो। साथै अमेरिकी आक्रमणमा काबुलको एक निर्दोष परिवारका व्यक्तिहरु पनि मारिएका थिए ।
पछिल्लो पटक शुक्रबार आईएसकै स्थानीय सङ्गठनले गरेको आत्मघाती बम आक्रमणमा ६० जनाभन्दा बढी मानिस मारिएका थिए ।
कुन्दुज प्रान्तमा रहेको एक शिया मस्जिदमा आक्रमण हुँदा २ सयभन्दा बढी मानिस घाइते भएको बताइएको थियो ।दोहामा हिजो सुरु भएको अमेरिकी अधिकारीहरुसँगको वार्तामा तालिबान प्रतिनिधिहरुले अफगानिस्तानमा हुने आतङ्कवादी गतिविधिविरुद्ध आफूहरु लड्न सक्षम रहेको जवाफ दिएको जनाइएको छ ।
तालिबान प्रवक्ता सुहैल शाहीनले आईएसविरुद्ध आफूहरु नै लड्ने बताएका हुन् । सन् २०१४ देखि आईएसले पूर्वी अफगानिस्तानमा शिया मुसलमानहरुलाई निशाना बनाएर आत्मघाती आक्रमण गर्दै आएको छ ।
