लुम्बिनी प्रदेशसभा बैठक पुन: स्थगित, संसदबाट वली र शाहीलाई पदमुक्त सूचना गर्नुपर्ने एमालेको अडान
आज दिउँसो बस्ने भनिएको लुम्बिनी प्रदेशसभा बैठक ७ गतेसम्मका लागि स्थगित भएको छ ।
प्रमुख प्रतिपक्ष दल नेकपा एमालेले आफ्ना दुई सांसदलाई पदमुक्त गरेको सूचना नआउँदासम्म सदन रोक्ने अडानबाट टसमस नभएपछि आज दिउँसो बस्ने भनिएको लुम्बिनी प्रदेशसभा बैठक ७ गतेसम्मका लागि स्थगित गरिएको हो ।
प्रदेशसभा सचिवालयले भदौ सूचना जारी गर्दै भदौ ७ गतेसम्मका लागि बैठक स्थागित भएको जनाएको हो । प्रदेशसभा नियमावली, २०७४ को नियम ६ को उपनियम (३) बमोजिम आजको बैठक स्थगित गरिएको प्रदेशसभा सचिववालयले जानकारी दिएको छ ।
भदौ १ गतेदेखि शुरू भएको अधिवेशन एमालेको निरन्तर अवरोधका कारण अगाडि बढ्न सकेको छैन। एमालेले सूर्य चुनाव लिएर निर्वाचित नवलपरासीका अजय शाही र दाङका विमला वली पार्टी हितविपरीत गएकाले कारबाही गरी संसदबाट पदमुक्त गर्न प्रदेशसभामा निवेदन दिएपनि कारवाही अगाडि नबढाइएको एमालेका प्रमुख सचेतक भूमिश्वर ढकालले बताए ।
उनले विगतमा सभामुख पूर्णबहादुर घर्ती र प्रदेशसभा सचिव दुर्लभकुमार पुनको मिलेमतोमा निवेदन आउँदासाथ पदमुक्त गरेको नजिर भएपनि एमालेले प्रकृयागत ढंगले दिएको निवेदनलाई बेवास्ता गरिएको बताए ।
ढकालले यो प्रकृया अगाडि नबढाए कुनैपनि हालतमा सदन चल्न नदिने बताए ।
