ओलीले बोलाएको संसदीय दलको बैठकमा नेपाल पक्ष नजाने, नयाँ पार्टी गठनका लागि ‘कसरत’ !
नेकपा एमाले बोलाएको संसदीय दलको बैठकमा माधव नेपाल पक्ष नजाने भएको छ।
सरकारबाट बाहिरिएपछि पहिलोपटक संसदीय दलका नेता केपी शर्मा ओलीले शुक्रबार बैठक बोलाएका छन् । नेपाल पक्षका सांसद तथा केन्द्रीय सदस्य मेटमणि चौधरीले बैठकमा नजाने सल्लाह भएको जानकारी दिए।
पुनःस्थापित संसदमा एमालेको भूमिकाबारे छलफल गर्न बैठक बस्न लागेको प्रमुख सचेतक विशाल भट्टराईले बताए ।
बैठकमा नेपाल पक्षका सांसदलाई पनि खबर गरिएको उनले जानकारी दिए ।
यसैबीच, एमालेभित्रको नेपाल समूह नयाँ कम्युनिष्ट पार्टी गठनका लागि दौडधूपमा लागेको छ ।
प्रधानमन्त्रीबाट नेपाल समुहकै हस्ताक्षरका कारण अपदस्थ भएका ओलीले नेपाललाई नस्वीकार्ने सार्वजनिक अभिव्यक्ती दिएसँगै नेपाल माओवादी केन्द्र, विप्लव समुहसहितको कम्युनिष्ट पार्टीको गठनमा लागेको स्रोतको दावी छ ।
बिहीबार मात्रै नेपाल, माओवादी केन्द्रका अध्यक्ष प्रचण्ड र विप्लवबीच यसबारे कोटेश्वरमा छलफल भएको बताइएको छ ।
भर्खरै मात्रै प्रधानमन्त्री भएका शेरबहादुर देउवाले नेपाललाई बुधबार भेटेर दल बिभाजन गर्न सघाउ गर्ने आश्वासन दिएका थिए ।
आश्वासन पाएलगत्तै अब ओलीसँगै एमालेमा एक हुने सम्भावना टरेको निष्कर्शका साथ नेपाल बृहत कम्युनिष्ट पार्टीको निर्माणमा लागेको नेपाल निकट स्रोतले बतायो ।
