कोशीको निति तथा कार्यक्रम सार्वजनिक, उत्कृष्ट कर्मचारीलाई १/१ लाख पुरस्कार
प्रदेश १ स्थित सुनसरीको सिमावर्ती पालिका कोशी गाउँपालीकाले निति तथा कार्यक्रम सार्वजनिक गर्दे ३ कर्मचारीलाई पुरस्कृत गरेको छ ।
वर्षभर उत्कृष्ट कार्य सम्पादन गरेको भन्दै एक औपचारिक कार्यक्रमबीच कर्मचारीहरुलाई पुरस्कृत गरिएको हो ।
पालीकाका प्रमुख प्रशासकीय अधिकृत खगेन्द्र गिरी, नायब सुब्बा राजकिशोर मेहता र प्राविधिक मुन्ना ठाकुरलाई पुरस्कृत भएका छन् ।
पालीका अध्यक्ष ऐयुब अन्सारी, कार्यक्रमका प्रमुख अतिथि इनरुवा नगरपालिकाका मेयर राजन मेहता, उपाध्यक्ष अनिता यादवलगायतले नगदसहित सम्मानित गरेका हुन ।
पालीकाको आठौं गाउँसभाको अवसरमा गिरी र मेहतालाई सम्मानपत्रसहित नगद एक/एक लाख र ठाकुरलाई नगद २५ हजार सहित सम्मान गरिएको हो ।
त्यस्तै, चालु आर्थिक वर्षमा सबैभन्दा बढी राजस्व असुली गर्ने कोशी गाउँपालीका वडा नम्बर १ लाई समेत पुरस्कृत गरिएको थियो । वडा नम्बर १ को पुरस्कार वडाध्यक्ष राजकुमार साहले ग्रहण गरेका थिए ।
निति तथा कार्यक्रम सर्वजनिक
यसैबीच पालीकाको अगामी आर्थिक वर्षका लागि योजना, निति तथा कार्यक्रम गाउँसभाबाट सर्वजनिक गरिएको छ । कोशी गाउँपालीकाले आगामी आर्थिक वर्ष २०७८/०७९ को वार्षिक बजेट निति तथा कार्यक्रम सार्वजनिक गरेको हो ।
पालिका सदरमुकाम लौकहीमा बुधबार आयोजित ८ औं गाउँसभा कार्यक्रमका बीच कोशी गाउँपालीकाका अध्यक्ष ऐयुब अन्सारीले ४८ करोड २ लाख ७३ हजार बराबरको वार्षिक बजेट निति तथा कार्यक्रम सार्वजनिक गरेका हुन ।
कोशी गाउँपालीकाले आगामी आर्थिक वर्षको लागि चालु खर्चतर्फ २५ करोड ५० लाख ७३ हजार र पुजिगतखर्चतर्फ २२ करोड ५२ लाख गरी ४८ करोड २ लाख ७३ हजार बराबरको वार्षिक बजेट निति तथा कार्यक्रम सार्वजनिक गरेको हो ।
इनरुवा नगरपालिकाका मेयर राजन मेहताको प्रमुख आतिथ्यमा भएको गाउँसभा मार्फत गाउँपालीका अध्यक्ष ऐयुब अन्सारीले केही लोकप्रिय योजनाहरु समेत प्रस्तुत गरेका छन् ।
“प्रयाप्त पूर्वाधार, गाउँमै रोजगार, कृषि र पर्यटन समृद्धिको आधार”
पालीकाले “प्रयाप्त पूर्वाधार, गाउँमै रोजगार, कृषि र पर्यटन समृद्धिको आधार” भन्ने आकांक्षाका साथ आर्थिक बर्ष २०७८।०७९ को लागि बजेट नीति तथा कार्यक्रम प्रस्तुत गरेको अध्यक्ष अन्सारीले बताए ।
“गाउँमा दिगो भौतिक पूर्वाधार, कृषि र पर्यटन समृद्धिको आधार” भन्ने नारा अनुरोध कोशी गाउँपालीकाले प्रत्येक वडामा गाउँका कच्ची सडकलाई कल्भर्ट, ह्युम्पाइप सहित ग्राभेल सडकमा स्तरउन्नति गरिने नीति लिएको छ ।
“एक वडा एक गौरव योजना”
त्यसैगरी “एक वडा एक गौरव योजना” कार्यक्रम अन्तर्गत प्रत्येक वडामा कम्तिमा ५ करोड लागतको एक योजना पहिचान गरी कार्यान्वयन गर्ने जनाएको छ ।
“एक वडामा एक खेल मैदान ”
“एक वडामा एक खेल मैदान ” को अवधारणाअनुसार गाउँपालीका क्षेत्रमा रहेका ऐलानी सार्वजनिक जग्गालाई संरक्षण गरी खेल मैदान तथा पार्कका रूपमा विकास गर्ने निति लिएको छ ।
भैंसी सुन्दरी प्रतियोगिता लाई निरन्तरता
कोशी गाउँपालीकाले गरेको गाई भैंसी सुन्दरी प्रतियोगिता लाई निरन्तरता दिदै किसानको मनोबल उच्च गर्न सहभागी कृषकलाई पुरस्कार समेत वितरण गरिने योजना ल्याएको छ ।
कृषि क्षेत्रमा नेपालकै नमुना कार्यक्रमको रूपमा छनोट भएको र कृषिको आधुनिकीकरणमा समेत सहयोग पुग्ने भएकोले योजनालाई निरन्तरता दिएको अन्सारीको भनाइ छ ।
