सामुहिक राजीनामा दिएर अपराध नगर्न माधव नेपाल समूहका सांसद्हरुलाई ओलीको अपिल
नेकपा एमालेका अध्यक्ष केपी शर्मा ओलीले आफू पार्टी एकताको पक्षमा रहेकाले कसैलाई पनि काखा पाखा नगर्ने बताएका छन् ।
आइतवार प्रेस वक्तव्य जारी गर्दै अध्यक्ष ओलीले एमाले वैयक्तिक स्वार्थ, अहंकार र स्वार्थपूर्तिको माध्यम बन्न नहुने बताएका हुन् । उनले नेता माधवकुमार नेपाल पक्षधर पार्टीलाई पछि पार्ने हानिकारक प्रयासमा लागेको आरोप लगाएका छन् ।
‘आफ्नो पार्टीलाई फुटाउन, ढाल्न, पराजित गर्न र विरोधीहरूका स्वार्थलाई मलजल गर्न कतै फ्लोसक्रस गर्ने, कतै अविश्वास प्रस्ताव राख्ने र कतै केही नलागे सामूहिक राजीनामा गराई आफ्नो राजनीतिक जीवन नै समाप्त पारेर भए पनि पार्टीलाई पछारी छाड्नेजस्ता हानिकारक प्रयास भएका छन्,’ ओलीको विज्ञप्तिमा भनिएको छ ।
अध्यक्ष ओलीले विरोधीलाई सहयोग पुर्याउँदै दिग्विजय मनाउने घातक क्रियाकलापलाई इतिहासले माफ नगर्ने बताएका छन् । यस्ता गतिविधमा संलग्न नहुने उनले कार्यकर्तालाई अपिल गरेका छन् ।
सामूहिक राजीनामा दिनू अपराध हुने भन्दै यस्ता काममा सहभागी नहुन पार्टीका सांसदहरुलाई आग्रह गरेका छन् ।
आइतबार विज्ञप्ति जारी गर्दै उनले फ्लोर क्रस गर्ने, अविश्वास प्रस्ताव राख्ने, सामूहिक राजीनामा गर्ने जस्ता हानिकारक प्रयास भएको भन्दै त्यस्तो कार्यलाई अपराध भनेका छन् ।
