भारतमा एकैदिन ३६ सयभन्दा बढीको मृत्यु, तीन लाख ७९ बढी संक्रमित
छिमेकी मुलुक भारत पछिल्लो समयमा कोरोना माहामारीको दोस्रो लहरबाट एकदमै चपेटामा परेको छ । भारतमा बिहीबार ३ हजार ६ सय ४५ जना कोरोना संक्रमितको मृत्यु भएको भारतको स्वास्थ्य मन्त्रालयले जनाएको छ ।
दोस्रो लहर सुरु भएसँगैं यति धेरै संक्रमितको मृत्यु भएको यो नै पहिला पटक हो । यस्तै गत २४ घण्टामा ३ लाख ७९ हजार २५७ जना कोरोना संक्रमित थपिएका छन् । भारतमा कोरोनाका कारण दैनिक तीन लाख बढी संक्रमित हुँदै आएका छन् ।
भारतमा हालसम्म एक करोड ८३ लाख ७६ हजार ५२४ जनामा कोरोना संक्रमण भइसकेको छ । हालसम्म २ लाख ४ हजार ८३२ कोरोना संक्रमितको मृत्यु भइसकेको छ ।
अक्सिजन, आइसीयु, भेन्टिलेटरको पर्याप्तता नहुँदा भारतमा मर्नेको संख्या दिनहुँ बढिरहेको छ । दैनिक मृत्युदर बढ्दा शव जलाउनसमेत लाइन बस्नु परेका तस्वीर तथा भिडियोहरु समाचार र सामाजिक सञ्जालमा भाइरल भएका छन् ।
