पाकिस्तानको क्वेटा शहरमा विष्फोट हुदाँ ४ जनाको मृत्यु, ११ घाइते
पाकिस्तानको क्वेटा शहरमा रहेको एक होटलमा विष्फोट हुदाँ कम्तिमा ४ जनाको मृत्यु भएको छ । उक्त विष्फोटमा परी ११ जना घाइते भएका छन् ।
क्वेटा शहरमा अवस्थित चर्चित होटल सेरेनाको पार्किङ क्षेत्रमा विष्फोट भएको बीबीसीले जनाएको छ । पाकिस्तानका गृहमन्त्री शेख राशिद अहमदले एक टेलिभिजनलाई दिएको प्रतिक्रियाअनुसार विष्फोटक पदार्थले भरिएको कार पार्किङ क्षेत्रमा विष्फोट भएको थियो ।
विष्फोटको जिम्मा तालिवानले लिएको छ ।सेरेना उच्च सरकारी अधिकारीहरुको बढी आउजाउ हुने होटलको रुपमा चर्चित छ ।सामाजिक सन्जालमा सेयर गरिएको भिडियोहरुमा विष्फोटपछि आगोको ठूलो लप्का माथि–माथिसम्म पुगेको देखिन्छ ।
क्वेटा शहर बलुचिस्तान प्रान्तको राजधानी हो, जुन अफगानिस्तानको सीमा नजिक छ । बलुचिस्तान क्षेत्रमा पृथकतावादी समूह लामो समयदेखि सक्रिय छ ।
बलुचिस्तान क्षेत्रमा चीनले ठूलो परियोजनामा लगानी गरेको छ र त्यसको विरोध पृथकतावादी समूहले गर्दै आएको छ । त्यसैले यो आक्रमण पाकिस्तानका लागि चिनियाँ राजदूत लक्षित हुनसक्ने स्थानीय मिडियाका रिपोर्टरहरुले बताएका छन् ।
यद्यपि चिनियाँ राजदूत नोङ्ग रोङ्ग क्वेटा शहरमा रहे पनि सो होटलमा भने थिएनन् ।
