लोक सेवा आयोगद्वारा परीक्षामा अनियमितता गर्ने २१ जनाको परीक्षा रद्द
नेपाल प्रहरी तर्फ प्रहरी जवान(जनपद) पदको परीक्षामा अनियमितता गर्ने २१ जनाको परीक्षा लोक सेवा आयोगले रद्द गरिदिएको छ ।
आयोगले २०७७ फागुन २२ मा सञ्चालन गरेको प्रहरी जवान पदको लिखित परीक्षामा नक्कली परीक्षार्थी बनी परीक्षा दिने र सक्कली परीक्षार्थी दुबैलाई पाँच वर्षसम्म लोक सेवाबाट सञ्चालन हुने कुनै पनि परीक्षामा संलग्न हुन नपाउने गरी निलम्बन गरिएको आयोगले जनाएको छ ।
आयोगले प्रहरी जवान पदको लिखित परीक्षामा अनियमितता गर्ने परीक्षार्थीहरूको परीक्षा रद्द गर्नुको साथै ५ वर्ष आयोगका कुनै पनि परीक्षामा संलग्न हुन नपाउने गरी निलम्बन गर्ने निर्णय गरेको हो ।
यस्तै, उनीहरूलाई प्रचलित कानुनबमोजिम अनुसन्धान गरी आवश्यक कारबाही गर्न नेपाल प्रहरीको सम्बन्धित कार्यालयलाई सिफारिस गर्ने आयोगले जानकारी दिएको छ ।
नक्कली परीक्षार्थीले सक्कली परीक्षार्थीको नागरिकता र प्रवेश पत्रमा फोटो परिवर्तन गरी परीक्षा दिएको आयोगको ठहर छ ।यसै गरी उत्तर पुस्तिकामा आफ्नो विवरण लेखि हाजिरीसमेत गरी प्रश्न पत्र पाउनु अगावै परीक्षा केन्द्रबाट भागी गएका एक जनाको भने लिखित परीक्षा मात्रै रद्द गरिएको छ ।
