अब दैनिक २० किलो सुन आयात गर्न पाइने
नेपालमा अब दैनिक २० किलो सुन आयात गर्न पाइने भएको छ । नेपाल राष्ट्र बैंकले दैनिक २० किलोसम्म सुन आयात गर्न पाउने व्यवस्था गरेको छ ।
केन्द्रीय बैंकले बिहीबार एकीकृत परिपत्र-२०७६ मा संशोधन गर्दै उक्त व्यवस्था गरेको हो । नेपाल सुनचाँदी व्यवसायी महासङ्घलगायतले सुन आयातको कोटा बढाइदिन सरकार, राष्ट्र बैंक र उद्योग वाणिज्य तथा आपूर्ति मन्त्रालयसँग माग गर्दै आएका थिए ।
सोही मागअनुसार नै सुन आयात तथा बिक्रीवितरणसम्बन्धी कार्यविधिमा संशोधन गरिएको हो । राष्ट्र बैंकका कार्यकारी निर्देशकका अनुसार आयात गर्न सकिने सुनको दैनिक परिमाण हाललाई २० किलोग्राम कायम गरिएको छ ।
विशेषगरी वाणिज्य बैंकले सुन आयात गरिरहेका छन् ।विदेशी विनिमय कारोबार गर्न इजाजत प्राप्त बैंक तथा वित्तीय संस्था र अन्य निकायलाई जारी गरिएको एकीकृत परिपत्रमा संशोधन गर्दै सुन आयातको परिमाण बढाइएको हो ।
