भारतमा एकैदिन थपिए ६८ हजार भन्दा धेरै कोरोना संक्रमित, नेपाल पनि जोखिममा
छिमेकी देश भारतमा पछिल्लो समयमा कोरोना संक्रमण तिब्र फैलिरहेको छ । पछिल्लो २४ घण्टामा भारतमा ६८ हजार भन्दा धेरै मानिसमा कोरोना संक्रमण पुष्टि भएको भारतको स्वास्थ्य मन्त्रालयले जनाएको छ ।
यो गत वर्ष अक्टोबर पछिकै सबैभन्दा उच्च संख्या हो ।सोमबार थपिएको संक्रमितको संख्यासँगै भारतका कुल कोरोना संक्रमितको संख्या १ करोड २० लाख भन्दा धेरै भइसकेको छ । यसमा सक्रिय संक्रमितको संख्या ५ लाख भन्दा धेरै रहेको मन्त्रालयले जनाएको छ ।
२४ घण्टामा २ सय ९१ जनाको कोरोना संक्रमणको कारण मृत्यु भएको छ । योसँगै भारतमा कोरोना भाइरस संक्रमणबाट मृत्यु हुनेको संख्या १ लाख ६१ हजार पुगेको भारतीय सञ्चारमाध्यमले उल्लेख गरेका छन् ।
पछिल्लो सयम भारतमा कोरोना बढेसँगै नेपालमा पनि कोरोना संक्रमणको जोखिम बढेको छ । भारतबाट नेपाल भित्रिनेको संख्या बढेसँगै सीमामा स्वास्थ्य जाँचमा कडाइ गरिएको छ ।
यद्यपि धेरै सिमानामा व्यवस्थित हुन नसक्दा नेपालमा पनि कोरोना संक्रमितको संख्या बढ्नसक्ने अनुमान गरिएको छ ।स्थानीय सरकारले सिमानामा हेल्थ डेस्कको स्थापना गर्दै ज्वरो नाप्ने र कोरोनाको एन्टिजेन परीक्षणको पनि व्यवस्था गरिएको छ ।
