राष्ट्रपति बाइडेनद्वारा म्यानमारका सैन्य नेतृत्वमाथि प्रतिबन्ध
अमेरिकी राष्ट्रपति जो बाइडेनले म्यानमारका सैन्य नेतृत्वहरुमाथि प्रतिबन्ध लगाएका छन् ।
राष्ट्रपति बाइडनले म्यानमारमा सैन्य कू गर्ने नेताहरुमाथि प्रतिबन्ध लगाउने कार्यकारी आदेशमा हस्ताक्षर गरेका हुन् ।
प्रजातन्त्रवादी नेतृ आङसाङ सुची लगाएतका नेताहरुको रिहाई र प्रजातन्त्र पुनर्वहालीको माग राख्दै म्यानमारमा लगातार प्रदर्शन भईरहेको समयमा अमेरिकाले सैन्य नेताहरुमाथि प्रतिबन्धको घोषणा गरेको हो ।
कार्यकारी आदेश अनुसार सैन्य नेतृत्व, उनीहरुका परिवारका सदस्य र उनीहरुसँग जोडिएका व्यवसायलाई निशाना बनाइएको छ ।
यसैगरी अमेरिकामा रहेका एक अर्ब अमेरिकी डलर बराबरको सरकारी कोषमा म्यानमार सेनाको पहुँचमा पनि प्रतिबन्ध लगाइएको जनाइएको छ ।
अमेरिकी राष्ट्रपति बाइडेनले निर्वाचित नेतृत्वलाई सत्ता हस्तान्तरण हुनु पर्ने र नेतृ सूचीसहित गिरफ्तार सबै नेताहरु रिहा गरिनु पर्ने बताउँदै आएका छन् ।
आवश्यक परेमा थप कदम पनि चाल्ने बताउँदै बाइडेनले प्रजातन्त्रका लागि प्रदर्शनमा सहभागिहरुमाथि हुने कुनै पनि प्रकारको हिंसा वा ज्यादती स्वीकार्य नरहेको चेतावनी दिए । ।
म्यानमारमा निर्वाचित सत्ता हत्याएर शक्ति आफ्नो हातमा लिएको सेनाले एक वर्षका लागि संकटकाल घोषणा गरेपछि त्यसको विश्वव्यापी रुपमा विरोध भइरहेको छ ।
