दुई वटा पेस्तोल र गोलीसहित जनकपुरमा एक युवक पक्राउ
प्रदेश नं २ स्थित जनकपुरबाट दुई वटा पेस्तोलसहित एक जना पक्राउ परेको छ ।
जनकपुरधाम उपमहानगरपालिका-१९ स्थित बावनबिग्हा जाने बाटोबाट लक्ष्मिनियाँ गाउँपालिका-१ बस्ने विवेक यादवलाई पक्राउ गरेको जिल्ला प्रहरी कार्यालय धनुषाले जनाएको छ ।
हतियार ओसारपसार गरिरहेको गोप्य सूचनाको आधारमा उनलाई जिल्ला प्रहरी कार्यालय धनुषाबाट खटिएको प्रहरीले नियन्त्रणमा लिएको डिएसपी मकेन्द्र मिश्रले जानकारी दिए ।
उनको साथबाट दुई थान कटुवा पेस्तोल र दुई वटा गोली बरामद भएको छ ।पक्राउ परेका यादवलाई आवश्यक कारवाहीका लागि प्रक्रिया अघि बढाइएको र घटना सम्बन्धमा थप अनुसन्धान भइरहेको प्रहरीले जनाएको छ ।
