औपचारिक रुपमा बन्द रहेको भारतीय सीमा नाका खोल्ने सरकारी तयारी सुरु
उपप्रधानमन्त्री ईश्वर पोखरेलले लामो समयदेखि बन्द रहेको भारतीय सीमा नाका सरकारले अब खोल्ने तयारी थालेको बताएका छन् । प्रदेश २ स्थित बारामा आयोजित नेकपाको एक भेला कार्यक्रममा उनले यस्तो बताएका हुन् ।
सीमा नाका खेलाउन सोमबारै गृह सचिवसित आफूले कुरा गरेको उनले बताए । सीमा खोलिँदा सचेतना भने कायम राख्न आग्रह गरे । ‘कोभिडले कुनै कर्मचारी र समुदाय नछोड्ने भएकाले सीमा नाका खुलेपनि सचेतना अपनाई राख्नुपर्छ,’ उनले भने ।
बारा जिल्लाका सिम्रौनगढ र मटिअर्वा नाकासमेत खोलिने उनले आश्वासन दिएका छन् ।
उनका अनुसार कोरोना भाइरस महामारीका कारण लामो समयदेखि बन्द रहेको भारतीय सिमा नाका सरकारले खोल्ने तयारी गरेको हो । महामारीको जोखिम कम भएपछि सरकारले चाँडै सिमानाका खोल्ने सरकारी तयारी छ।
‘सीमा नाका बन्दले खासगरी तराई-मधेसमा विवाह, गाडी आउजाउ, किनमेललगायतको समस्या र चिन्ता छ, यसलाई म यहाँबाट जाने बित्तिकै प्रधानमन्त्रीलाई कुरा गरेर सीमा नाका खुलाउँछु,’ उपप्रधानमन्त्री ईश्वर पोखरेलले भने, सीसीएमसीको प्रमुखको हैसियतले बैठक बसेर नाका खोल्ने निर्णय गर्छु ।’
