राजस्वका कर्मचारीलाई कस्दै अर्थमन्त्री, ठिक तरिकाले काम नगरे कठोर बन्ने चेतावनी
अर्थमन्त्री विष्णुप्रसाद पौडेलले कर्मचारीलाई कस्ने नीति अख्तियारी गर्न थालेका छन् ।
कार्यसम्पादनमा कर्मचारीबाट ढिलासुस्ती हुन थालेपछि उनले कर्मचारीमाथि निगरानी बढाउन थालेका हुन ।
यसैक्रममा पौडेलले अर्थ मन्त्रालयका सचिवहरु, आन्तरिक राजस्व विभाग र भन्सार विभागका महानिर्देशक, भन्सार तथा आन्तरिक राजस्व कार्यालयका प्रमुखहरू लगायत सहित एकसय कर्मचारीसँग आज भिडियो संवाद गरे ।
अर्थमन्त्री पौडेलले कोभिड-१९ ले सिर्जना गरेका चुनौतीहरुको सामना गर्दै राजस्व संकलनको लक्ष्य पूरा गर्न कुनै सम्झौता नगर्ने बताए ।
उनले नियतवश त्रुटि, कमजोरी गर्ने र असल मनसायबाट विचलित हुने कर्मचारीलगायत जो-कोहीलाई पनि नछाड्ने बताए । डर, त्रास सिर्जना गरेर कर्मचारीहरुलाई काममा नलगाउने स्पष्ट पार्दै अर्थमन्त्री पौडेलले योग्यता र क्षमताको कदरसहित काम गर्ने अनुकूल परिस्थिति सिर्जना गरेर परिणाम निकाल्ने बताए ।
“कठिनाइ र समस्यालाई समाधान गर्न मन्त्रालयले सहयोग, सहजीकरण र प्रोत्साहन गर्छ । लक्ष्य पूरा भए हामी सम्मान गर्छौं । पूरा नभए तपाईंहरु दण्डित हुनुपर्छ,” उनले भने ।
अर्थमन्त्री पौडेलले कोभिडका कारण ‘ब्याक गेयर’ लगाएर राजस्वको लक्ष्य निर्धारण गरिएको भन्दै चालु आर्थिक वर्ष सकिँदा धेरैलाई सम्मान गर्ने वातावरण बनाउन अनुरोध गरे । उनले इमानदार र सक्रिय भएर लाग्न पनि निर्देशन दिए ।
मन्त्री पौडेलले समस्या र समाधानबारे कर्मचारीहरु जानकार रहेको बताउँदै आफ्नै तहमा समाधान गर्न र आवश्यकता परे मात्र नेतृत्वलाई भन्न आग्रह गरे । उनले भने, “आफ्नो तहमा समाधान गर्न सक्नु भएन भने नेतृत्वलाई भन्नुहोस् । हामी सहयोग गर्न तयार छौं ।”
पौडेलले परिणाम निकाल्ने गरी काम गर्न कर्मचारीको व्यक्तित्व विकास र क्षमता अभिवृद्धिमा विशेष जोड दिने उल्लेख गर्दै आपसी प्रतिष्पर्धा गरेर काम गर्न पनि अनुरोध गरेका छन् ।
भर्चुअल माध्यमबाट आयोजना गरिएको कार्यक्रममा अर्थसचिव शिशिरकुमार ढुङ्गानाले राम्रो काम गर्नेलाई मन्त्रालयले संरक्षण तथा पुरस्कृत गर्ने र कार्य सम्पादन कमजोर भए मन्त्रालय कठोर बन्ने बताए । उनले राजस्वको लक्ष्य पूरा गर्न र त्योभन्दा बढी परिणाम निकाल्न आवश्यकताअनुसार कार्यक्रम संशोधन र रणनीतिहरु बनाएर अघि बढ्न निर्देशन दिए ।
राजस्व सचिव रामशरण पुडासैनीले चुहावट नियन्त्रणमा विशेष ध्यान दिन आग्रह गर्दै लगानीलाई प्रोत्साहन गर्ने गरी काम गर्न अनुरोध गरे । उनले करदाता, लगानीकर्ता, सेवाग्राहीले गुनासो नगर्ने गरी काम गर्न आग्रह गर्दै निर्णय र कार्यान्वयन प्रक्रियामा समस्या भए समाधान गर्ने बताएका थिए । कार्यक्रममा सयभन्दा बढी अर्थ प्रशासनका कर्मचारी सहभागी थिए ।
