बैतडी बस दुर्घटनामा मृत्यु भएका नौ मध्ये पाँच जनाको पहिचान खुल्यो
सुदूरपश्चिम प्रदेश स्थित बैतडीको खोड्पेमा बस दुर्घटना हुँदा ९ जनाको मृत्यु भएका मध्ये ५ जनाको नाम खुलेको छ ।
गएराति १० बजे भएको दुर्घटनामा अन्य ३४ जना घाइते भएका छन् ।मृतकमध्ये पाँच जनाको नाम मात्रै खुलेको छ । बैतडीको दोगडाकेदार-६ का प्रहरी जवान रणवहादुर चन्दको परिचय पत्रका आधारमा सनाखत भएको छ ।
त्यसैगरी नरेन्द्र चौधरी, जगतनाथ ओझा, विमल वडु र तारा गिरीको पनि दुर्घटनामा परी मृत्यु भएको छ ।मृतकमध्ये सात जना पुरुष र दुई जना महिला छन् ।
घाइते भएका ३४ जना मध्ये गम्भीर घाइते सात जनालाई धनगढी पठाइएको छ ।बाँकी २७ जनाको डडेल्धुरा अस्पतालमा उपचार भइरहेको छ ।
मृतकमध्ये आठ जनाको शव घटनास्थलबाट निकालिएको छ भने एक जनाको शव बसबाट निकाल्ने प्रयास भइरहेको प्रहरीले जनाएको छ ।
बैतडी र दार्चुलाको सीमा क्षेत्र गन्नादेखि कञ्चनपुरको महेन्द्रनगरका लागि छुटेको पवनदूत यातायातको ना ५ ख ५१४१ नम्बरको बस भीरबाट खसेको जिल्ला प्रहरी कार्यालय बैतडीले पुष्टि गरेको छ ।
साँघुरो सडकमा रहेको सानो घुम्तीबाट बस ६०० मिटर तल खसेको प्रहरीले जनाएको छ ।प्रहरी र स्थानीयबासी मिलेर राति नै घटनास्थलबाट घाइतेहरुको उद्धार गरिएको थियो । बस बैतडीको दोगडाकेदार-७ खोचलेकका वीरेन्द्र कार्कीको रहेको बताइएको छ ।
बसधनी आफैं चालक रहेका र उनीसमेत घाइते भएको प्रहरीले जनाएको छ ।
